Wees voorbereid op nog rentekoersstygings in ’16

Dinsdag, November 10th, 2015

Eugene Brink      

 

Weens groter inflasionêre druk sal rentekoerse na verwagting tot die einde van 2016 verder styg, sê Jacques du Toit, eiendomsanalis van Absa.

Jy sal dus waarskynlik ʼn groter bedrag op jou huis moet afbetaal sonder dat die waarde van jou huis veel sal groei.

“Die oorkoepelende verbruikersprysinflasie was in die eerste nege maande van 2015 gemiddeld 4,5% en dit sal na verwagting in die eerste kwartaal en weer in die vierde kwartaal aanstaande jaar tot bo die vlak van 6% op ʼn jaar-tot-jaar-grondslag styg. Oorkoepelende inflasie sal na verwagting gemiddeld 4,6% in 2015 en 5,7% in 2016 beloop. Die belangrikste risiko’s vir die inflasievooruitsig is voedselpryse, elektrisiteitspryse, die wisselkoers van die rand en die olieprys, met laasgenoemde twee faktore wat bepalend vir plaaslike brandstofpryse sal wees,” sê hy.

Volgens hom sal plaaslike rentekoerse na verwagting tot aan die einde van 2016 verder styg, en dit sal aangevuur word deur inflasionêre druk en uiteindelik deur hoër rentekoerse in die VSA oor die volgende 12 maande. “Dit kan veral op ontluikende markte se kapitaalvloei en wisselkoerse ʼn uitwerking hê.”

Du Toit sê die Suid-Afrikaanse ekonomie het in 2015 relatief moeilike omstandighede ervaar, met die bruto binnelandse produk wat in die tweede kwartaal van die jaar ʼn inkrimping beleef het. Algehele groei sal ook laag bly. “Aanduidings uit onlangse relatief swak datavrystellings oor vervaardiging en mynbouproduksie, asook die feit dat ernstige droogtetoestande is steeds in groot voedselproduserende streke heers en landbouproduksie daardeur onder afwaartse druk gehou sal word, voorspel niks goeds vir die ekonomie in die derde kwartaal nie. Met inagneming van hierdie faktore, asook die beperkte elektrisiteitsaanbod, inflasiedruk en verwagte hoër rentekoerse, sal die reële groeikoers na verwagting 1,4% in 2015 (1,5% in 2014) en 1,8% in 2016 wees.”

Hy sê dat aangesien die toestand van, en tendense in, huishoudelike finansies waarskynlik steeds deur verskeie ekonomiese faktore soos ekonomiese groei, indiensneming, inkomstegroei, skuldvlakke, inflasie en rentekoerstendense oorheers sal word, ekonomiese en indiensnemingsgroei in 2015-’16 na verwagting redelik gedemp sal bly.

Hy sê verder dat huisprysgroei sedert laat in 2014 ʼn geleidelike dalende tendens toon en die vooruitskatting is dat groei vir die res van die jaar en in 2016 ʼn enkelsyfergetal sal bly. “In vergelyking met die voorafgaande twee jaar word laer prysgroei vir 2015 en 2016 voorspel, hoofsaaklik as gevolg van tendense in en vooruitsigte vir belangrike makro-ekonomiese en huishoudelike sektorverwante faktore. Wat die verwagtinge vir nominale huisprysroei en verbruikersinflasie betref, word lae reële prysinflasie vir vanjaar in die vooruitsig gestel, met pryse wat in 2016 in reële terme bykans op dieselfde vlakke sal bly.”

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161