Wat is die verskil? Mediese fonds en mediese versekering

Dinsdag, Januarie 26th, 2016

Elmien Ackerman

 

Jy sien dalk gereeld die advertensies op televisie vir mediese versekering wat belowe om duisende rande uit te betaal indien jy in die hospitaal beland. Hoewel mediese versekering effens goedkoper is as om aan ʼn mediese fonds te behoort, bied ʼn mediese fonds verskeie ander voordele.

‘n Mediese fonds bied dekking as jy in die hospitaal beland maar, na gelang van die opsie wat jy kies, kan dit doktersgelde, medikasie en spesialisbesoeke ook insluit. Met mediese versekering, andersyds, betaal hulle slegs as jy in die hospitaal opgeneem word.

Kom ons kyk na ʼn vergelyking tussen ʼn mediese fonds en mediese versekering:

 

Mediese fonds:

 

  1. Enigiemand kan aan ʼn mediese fonds behoort ongeag ouderdom of gesondheid.
  2. As jy aan ʼn mediese fonds behoort, word die fonds volgens wet verplig om vir Voorgestelde Minimum Voordele te betaal. Dit sluit alle noodgevalle, ‘n lys van 270 mediese toestande en 25 kroniese toestande in.
  3. Alle hospitaalverwante koste word deur jou mediese fonds gedek (na gelang van die opsie wat jy gekies het).
  4. As jy in die hospitaal beland, tree die mediese fonds met die hospitaal in verbinding en die rekening word namens jou betaal.
  5. Mediese fondse word gekontroleer deur die Raad vir Mediese Skemas (RMS), wat gekontak kan word as jy probleme met jou mediese fonds ervaar.

 

Mediese versekering:

 

  1. Met mediese versekering kan die versekeraar hoër premies eis vir ouderdom of sekere mediese toestande.
  2. Die meeste medieseversekering-verskaffers betaal nie vir Voorgestelde Minimum Voordele nie.
  3. Alhoewel mediese versekering vir sekere uitgawes betaal wanneer jy in die hospitaal beland, sluit dit gewoonlik ekstra uitgawes soos doktersgelde, medisyne en laboratoriumtoetse uit.
  4. Met mediese versekering word die bedrag vir jou mediese koste direk aan jou uitbetaal. Dit word dus jou verantwoordelikheid om jou mediese rekeninge te vereffen.
  5. Die ombudsman kan gekontak word as jy probleme ervaar alhoewel hulle nie sommer aandag gee aan sake wat klein bedrae behels nie.

 

Hier is ʼn voorbeeld om verder die verskil tussen ʼn mediese fonds en mediese versekering te illustreer:

Christiaan is ʼn 28-jarige besigheidsman. Hy is ʼn lid van ʼn mediese fonds.

Anzel is ʼn 26-jarige ontwerper. Sy het mediese versekering.

Albei is in ʼn ernstige motorongeluk en word gehospitaliseer vir 10 dae. Albei se hospitaalrekeninge beloop R250 000.

 

Christiaan (mediese fonds):

 

  1. Christiaan betaal maandeliks R1 500 om aan sy mediese fonds te behoort.
  2. Na die ongeluk word Christiaan dadelik na een van die hospitale in sy mediese skema se netwerk geneem.
  3. Christiaan geniet die voordele wat sy mediese skema bied vandat hy in die hospitaal opgeneem word.
  4. Christiaan se hospitaalrekening is deur sy mediese fonds vereffen.

 

Anzel (mediese versekering)

 

  1. Anzel se mediese versekering is ʼn bietjie goedkoper – sy betaal R900 per maand.
  2. Anzel moet eers R50 000 betaal voor sy by ʼn private hospitaal opgeneem kan word.
  3. Anzel se mediese versekering betaal R3 000 vir elke dag wat sy in die hospitaal is. Sy kry dus R30 000 wanneer sy uit die hospitaal ontslaan word.
  4. Anzel moet haar hospitaalrekening van R250 000 betaal, maar sy het slegs R30 000 ontvang.

 

Dit lyk dalk aanloklik om duisende rande te ontvang as jy in die hospitaal beland, maar met stygende mediese koste bly dit steeds ʼn beter opsie om aan ʼn mediese fonds te behoort, selfs al kies jy ʼn hospitaalplan.

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150