Wat beteken diversifikasie van my beleggingsgeld?

Vrydag, Desember 4th, 2015

Francois Smit

 

Al ooit gehoor wanneer mense praat van al jou eiers in een mandjie sit?  Dit is interessant hoe mense se opinies daaroor verskil. ʼn Kliënt het by een geleentheid vir my gesê dat hy diversifiseer deur sy geld aan meer as een adviseur te gee om te bestuur.  Iemand anders voel dat diversifikasie plaasvind wanneer sy geld by meer as een bank gehou word. Dit is alles geldige argumente, maar is dit werklik ʼn verspreiding van risiko?

Die naaste aan die waarheid word gevind in verskillende bateklasse. Wat is ʼn bateklas? Dit is ʼn klassifisering van die tipe onderliggende bates wat in enige belegging met jou geld gekoop word. Die bekendste klasse is eiendom, aandele, effekte en kontant.  Diversifikasie beteken eerstens dat jou geld versprei word tussen die genoemde bates hierbo, en tweedens hoeveel geld in elke bateklas geplaas word.

Die keuse van hoeveel geld in elke bateklas geplaas gaan word, hang af van elke persoon se persoonlikheid, omstandighede en waar die persoon hom in sy lewensiklus bevind.  Die rede hiervoor is dat daar risiko’s aan elke bateklas verbonde is en elke persoon se aptyt vir risiko verskil.  Dit is egter broodnodig dat mense onderrig moet word oor die rede waarom daar risiko aan ʼn bateklas gekoppel word, en ook wat oor tyd met die risiko gebeur.

Diversifikasie kan ook verder afgebreek word binne elke bateklas.  Wat word daarmee bedoel? Neem aandele as ʼn bateklas. Deur verskillende aandele in verskillende maatskappye te koop, word reeds diversifikasie toegepas.  Selfs deur net een aandeel te koop, kan mens klaar diversifiseer. Hoe is dit moontlik? Neem tyd en Google ʼn maatskappy met die naam Remgro.  Dit is ʼn maatskappy wat ontstaan het uit die sakeryk van die Rupert-familie wat Rembrandt-sigarette vervaardig en verkoop het, en uitgebreide belange in die drankbedryf het.  Remgro koop aandele in ander kwaliteitmaatskappye.  Dit sluit onder andere in Medi Clinic, FirstRand-Groep (FNB Bank), Total, Rainbow Chickens, TSB (Transvaal Suiker), die PG Glass-groep, Distell (baie van die drank op winkelrakke se handelsmerke behoort aan Distell), en natuurlik Unilever (kyk hoeveel produkte in jou mandjie by Checkers is Unilever-produkte).

Waarop stuur ek af met al hierdie inligting?  Deur ʼn Remgro-aandeel te koop, word jou geld blootgestel aan, onder andere, mediese dienste, bankwese en versekering, die brandstofbedryf, die hoenderbedryf, suikerverplanting en -verwerking, glasprodukte, vele drankhandelsmerke en die meeste van die produkte in jou mandjie kruideniersware. Unilever verkoop Omo, Skip en Surf. Distell verkoop Amarula,  ʼn roomlikeur wat een van die topverkopers in die wêreld is.

Diversifikasie is dus nie wat dit op die oog af voorgee om te wees nie.  Dit verg dat ʼn mens dieper delf in die onderwerp en besef dat sommige van die eiers in een mandjie is sterker as ander, en dat daar  diversifikasie binne die mandjie self kan plaasvind.

Ander Artikels

Kry só die beste agent as jy huis verkoop
Vir baie van ons gaan die verkoop van ’n eiendom gepaard met hoë vlakke van angstigheid en onheil. So, waar kry mens iemand wat jy kan vertrou om jou deur die gevare en slaggate van die verkoopstransaksie te stuur? Volgens die Rawson Eiendomme is daar ’n paar belangrike goed om na op te let.   […]
Inkopies kan terapeuties wees
Dit is al gesê dat om op ʼn inkopie-tog te gaan negatief konnotasies het. Onder andere word materialisme en selfbevrediging voorgehou as redes om nie te koop nie. Om te koop en loerkoop (“window-shopping”) kan egter terapeuties wees, help jou om verandering te hanteer en verbeter jou bui. Moenie inkopie-terapie sommer afmaak as iets ligsinnig […]
Ken jou regte as ʼn deeltiteleienaar
Om in ʼn deeltitelkompleks te bly, het baie voordele. Dit kan egter minder aangenaam wees om te bly in ʼn kompleks wat deur andere bestuur word, veral as die voorsitter van die regspersoon hom of haar verbeel dat hy of sy meer magte as enigeen van die ander inwoners het. Laat ons dit duidelik stel: […]
1 2 3 160