Vyf groot aftreefoute en hoe om dit te vermy

Vrydag, November 11th, 2016

Navorsing toon dat net ses miljoen Suid-Afrikaners aan ‘n formele aftreefonds behoort. Dit beteken dat net 11% van die Suid-Afrikaanse bevolking moontlik gerieflik sal kan aftree.

Die vraag wat ons moet stel, is: “Waar maak Suid-Afrikaners die fout?”

 

  1. ’n Algemene gebrek aan begrip

Suid-Afrika het ’n baie lae spaarkoers. Een van die redes hiervoor is ’n gebrek aan kennis van die beste manier om te spaar.

Elizabeth Lwanga-Nanziri, HUB van die Suid-Afrikaanse Spaarinstituut, het onlangs gesê: “Ons ondervind nie net probleme met toegang tot formele spaar- en beleggingsmeganismes nie, maar ons word ook nie geleer en opgevoed hoe om effektief vir finansiële onafhanklikheid te werk nie.”

Hoewel baie van ons die begeerte het om vir aftrede te spaar, weet ons dikwels nie waar om te begin of watter produkte om te kies nie. Moenie in die slaggat van oningeligtheid val nie. Maak dit jou verantwoordelikheid om uit te vind watter aftreespaarprodukte beskikbaar is en watter voordele dit bied. ’n Professionele finansiële adviseur sal tyd gebruik om die verskillende aftreeprodukte vir jou te verduidelik en sal jou help om ’n spaarplan saam te stel wat vir jou lewenstyl sal werk.

 

  1. Spaar te min

Wanneer ons begin werk, wil ons tipies soveel geld van ons salaris as moontlik hê om te bestee. Ons sal tipies die minimum bedrag kies om in ons pensioen te belê. Wanneer ons ’n salarisverhoging kry, beskou ons dit as ’n bonus om elke maand te bestee. Oor die algemeen spaar Suid-Afrikaners egter nie genoeg vir aftrede nie.

Ons moet slimmer word oor ons aftreespaarpogings. Wanneer jy ’n salarisverhoging kry, moet jy ‘n groter bedrag vir pensioen spaar. Onthou ook om jou pensioenspaarbydrae aan te pas wanneer jou lewensomstandighede verander. As jou gade ophou werk om na die kinders om te sien, moet jou pensioenspaarbydrae genoeg wees vir julle albei.

As jy jou eie onderneming het, gebruik die “goeie jare” om meer vir jou pensioen of uittreeannuïteit te spaar.

 

  1. ’n Nasie van besteders

Om die skyn te probeer voorhou, is ’n bestedingslaggat vir baie Suid-Afrikaners. Ons ken die verskil tussen “wil hê” en “nodig het”, maar nogtans bestee ons die meeste van ons geld aan die “wil hê”, omdat dit vir ons kitsbevrediging bied en ons gelukkig maak.

Suid-Afrikaners is nie van nature spaarders nie en bykans 90% van ons bestee meer as wat ons verdien sodat ons ’n blink motor kan hê, in restaurante kan eet, inkopies kan doen en vakansie kan hou.

In Suid-Afrika het 33% van afgetredenes nog skuld om te betaal wanneer hulle aftree.

Dit is nie verkeerd om die lewe te geniet nie, maar dit is belangrik om die balans te kry en spaargeld opsy te sit voordat jy geld vir besteding opsy sit.

 

  1. Spaarprioriteite oor die jare: Begin te laat

Spaarprioriteite verander volgens jou lewenstadium, en dit is eers later in die lewe dat mense aftreebeplanning ernstig opneem.

Navorsing toon dat 56% van ons op ouderdom 28 vir aftrede begin spaar pleks van op 23. Wanneer jy jonk is, fokus jy op die afbetaling van skuld vir jou studies of jou eerste motor. Wanneer jy getroud is, begin jy spaar vir jou kinders se onderwys en betaal jy jou verband af. Eers teen ouderdom 40 begin jy besef dat aftrede vinnig naderkom en dat jy nie genoeg gespaar het om jou lewenstyl te handhaaf nie.

In hierdie stadium word dit regtig ’n uitdaging om die tekort in jou aftreebesparing die hoof te bied. Moenie die uitwerking van saamgestelde rente onderskat nie. Jy sal die beste spaarresultate kry as jy so gou moontlik selfs net ‘n klein persentasie van jou salaris begin spaar en hierdie bedrag inkrementeel verhoog namate jou salaris styg.

 

  1. Onttrekking van jou aftreegeld

Een van die grootste aftreefoute wat jy kan maak, is om jou pensioen te onttrek wanneer jy van werk verander.

Mense verander tipies tussen vyf en sewe keer van werk gedurende hulle leeftyd. Dit lyk aanloklik om jou swaar verdiende aftreespaargeld te onttrek, maar die meeste mense besef nie die verwoestende uitwerking wat dit op hulle langtermynpensioenplan het nie.

As jy jou geld vroeg onttrek, verloor jy nie net die bedrag wat jy onttrek nie maar ook die saamgestelde rente wat jy oor tyd daarop sou verdien het.

 

 

Bron: Discovery

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150