Verseker die beste wetlike uitkoms na ʼn ongeluk

Maandag, Augustus 1st, 2016

Die meeste mense laat dit na om die nodige besonderhede na ʼn ongeluk neer te skryf, wat rampspoedig mag wees wanneer jy alleen buite jou tuisdorp reis, in ʼn onbekende plek.

“Dit is belangrik om te weet daar is ʼn paar dinge wat jy direk na ʼn ongeluk kan doen om jou kanse op sukses in die hof te verbeter. Om aantekeninge te maak van die klein besonderhede, die dinge waaraan jy normaalweg nie sou dink nie, kan baie help om ʼn positiewe uitkoms vir jouself te verseker,” sê Tertius Bossert, hoof van FNB se Law on Call.

FNB se Law on Call gee die volgende wenke:

 

Maak aantekeninge van al die mense wat by die ongeluk teenwoordig was.

Nadat die ongeluk gebeur het, moet jy probeer om soveel inligting as moontlik te bekom van die ander betrokke party. Dit sluit al hulle persoonlike besonderhede in: hulle naam en van, hulle adres, kontakbesonderhede en ID-nommer.

“Waar moontlik, moenie skaam wees om jou foon te gebruik om ʼn foto van die ander party se ID-dokument te neem nie,” sê Bossert. “As daar ooggetuies van die ongeluk was – maak ook ʼn nota van hulle besonderhede; dit sluit passasiers in jou voertuig of die ander voertuig in, aangesien hulle benodig mag word om ʼn verklaring af te lê oor wat gebeur het.”

 

Voertuigbesonderhede en die ongelukstoneel

Nadat jy al die besonderhede van die betrokke persone neergeskryf het, moet jou volgende stap wees om al die besonderhede van die ander voertuig neer te skryf; dit sluit in die maak, model, kleur en registrasienommer van enige van die voertuie wat in die ongeluk betrokke was. “Jy kan ook die toestand neerskryf van die voertuig wat met jou in die ongeluk betrokke was: het die flikkerligte, remme en kopligte van die ander voertuig gewerk onmiddellik voor die ongeluk?” sê Bossert.

Jy moet ook gedetailleerde notas maak van die ongelukstoneel. Dit sluit in die korrekte spelling van die straatname,  is die kruising beheer deur ʼn verkeerslig en indien wel, was daar enige flitsende pyltjies wat sekere bane ryvoorrang gee. As jy voorts in ʼn area is wat onveilig voorkom, of miskien voel jy geïntimideerd en ongemaklik om tyd daar deur te bring, onthou dat jy jou foon kan gebruik om  ʼn foto van die kruising of die area te neem waar die ongeluk gebeur het.

 

Weer en sigbaarheid

 

Maak aantekeninge van die weerstoestande ten tye van die ongeluk. Omdat sigbaarheid op verskillende tye van die dag verskil, moet jy ook aanteken of die ongeluk tydens dagbreek, daglig, skemer of die aand gebeur het. Hierna moet jy ʼn nota maak van die pad se oppervlak: was dit droog, nat, of glibberig, of was daar slaggate en riwwe en was die geverfde lyne op die pad duidelik sigbaar?

“Ten slotte, as die SAPD of metro-polisie nie die ongelukstoneel besoek het nie, moet jy die ongeluk binne 24 uur aanmeld by die polisiestasie naaste aan die plek waar die ongeluk gebeur het. As jy soveel besonderhede as moontlik neergeskryf het, onmiddellik na die ongeluk, sal dit jou baie help. Dit is ook belangrik om te onthou dat dit verskeie maande mag neem voor so ʼn saak in die hof opeindig, so jy sal dankbaar wees dat jy al daardie besonderhede neergeskryf het,” sluit Bossert af.

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170