Uitgawe 5 2011-Hou gelddoring só uit huwelik se vlees

Vrydag, September 30th, 2011

Deur Moira-Marie Kloppers

“Trou is nie perdekoop nie,” sê die ouer mense dikwels om jongmense te waarsku dat trou ’n ernstige saak is. Finansieel gesproke is dit vandag heelwat eenvoudiger en goedkoper om ’n perd te koop as om te trou, en talle pasgetroudes besef kort voor lank dat geld maklik ’n onverwyderbare doring in ’n huwelik se vlees kan word.

Indien jong getroudes nie voor hulle huwelik reeds oop kaarte oor hul geldsake gespeel het nie, kan dit sommer uit die staanspoor wrywing veroorsaak. Wanneer ’n paartjie trou, smelt twee lewens saam, ook op finansiële gebied.

Om getroud te wees, beteken nie dat jy aan jou maat verantwoording moet doen oor elke sent wat jy verdien en uitgee nie. Dit beteken wel dat jou geld toekomstig vir julle gesamentlike doelwitte aangewend gaan word en dat julle dus saam oor groot aankope moet besluit.Talle jong paartjies vind dit egter baie moeilik om van die finansiële onafhanklikheid en onaanspreeklikheid van die ongetroude lewe afstand te doen.

Die geheim om geldsake binne die huwelik suksesvol te bestuur, lê nie opgesluit in hoeveel geld julle het nie, maar hoeveel julle daaroor kommunikeer. Elke egpaar behoort ’n vaste maandelikse afspraak te hê wanneer die gesin se geldsake hanteer en bespreek word.

KRAP GELDGERAAMTES UIT DIE KAS
Geldgeheime, soos oor groot skuld, ’n dobbelprobleem of selfs net oneerlikheid oor hoeveel ’n item gekos het, is een van die eerste en grootste struikelblokke wat ’n huwelikspaar moet oorkom wanneer dit by geldsake kom. Om getroud te wees, beteken dat jy jou huweliksmaat met al sy of haar goeie en slegte eienskappe aanvaar.

LEEF BINNE JUL VERMOË
Wees eerlik oor julle huisgesin se finansiële vermoë. Moenie bo julle inkomste probeer leef nie, want dit is die vinnigste manier om maand ná maand dieper in die skuld te raak.

WAT IS ONS FINANSIËLE DOELWITTE?
Gesels openlik oor julle individuele finansiële doelwitte. Maak dan ’n lys van finansiële doelwitte wat julle graag as egpaar wil bereik.Wees spesifiek en koppel spertye en bedrae aan elke doelwit. Prioritiseer julle doelwitte in volgorde van belangrikheid en maak praktiese voorstelle vir maniere om hierdie doelwitte te bereik.

BEGROOT VIR JULLE DOELWITTE
’n Begroting is noodsaaklik. Dit is die belangrikste maatstaf waarvolgens ’n egpaar mekaar aanspreeklik kan hou vir die huishouding se geldsake. Dit is ’n goeie idee dat elkeen ’n deel van sy eie geld kan hou om daarmee te doen wat hy of sy wil. Die bedrag wat elkeen maandeliks kan bestee, moet egter vooraf ooreengekom word en moet by die gesin se begroting inpas.

PASOP VIR SKULD
Probeer om bestaande skuld so vinnig en ekonomies moontlik af te los. Dit is noodsaaklik dat elkeen minstens een kredietfasiliteit op sy of haar naam onderhou, sodat elkeen ’n sterk kredietrekord kan opbou.

SPAAR
Wanneer julle grootste skuldlas onder beheer is, probeer om minstens 10% van julle inkomste in ’n noodfonds te spaar. So bou julle ’n neseier vir onvoorsiene gebeure, soos wanneer een van julle afgelê word. Indien julle tevrede is dat die noodfonds minstens twee maande se vaste uitgawes kan finansier, kan die spaargeld maandeliks belê word om vir aftrede te spaar.

HERSIEN DOELWITTE, BEGROTING
Dit is belangrik om elke ses maande oor julle behoeftes en doelwitte te gesels en dit te herprioritiseer waar nodig.

WEES PRAKTIES
Kom vooraf ooreen wie vir watter rekeninge of gereelde uitgawes verantwoordelik gaan wees. Weerstaan die versoeking om groot uitgawes dadelik aan te gaan. Dink goed na en ondersoek eers al die alternatiewe.

Kommentaar is gesluit.

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161