Teen watter koers sal huispryse in 2016 styg?

Maandag, Desember 7th, 2015

Eugene Brink

 

Die geleidelike afwaartse neiging in die plaaslike jaarlikse huisprysgroei sedert die einde van 2014 het tot in November 2015 voortgeduur, sê Jacques du Toit, eiendomsontleder by Absa.

“Groei op ‘n jaargrondslag in die gemiddelde nominale waarde van huise in die middelsegment van die Suid-Afrikaanse huismark het van 4,6% in Oktober verder tot 4,2% in November afgeneem. Op ‘n maandelikse grondslag het huisprysgroei afgeneem tot ’n bykans onbeduidend vlak van minder as 0,1% in November, wat bygedra het tot die dalende neiging in die jaar-tot-jaar groei in pryse,” het hy gesê.

Hierdie tendense in die waarde van huise is op die Absa-huisprysindekse gegrond, wat gegrond is op aansoeke vir verbandfinansiering vir middelsegment klein, mediumgrootte en groot huise wat deur die bank ontvang en goedgekeur is.

Du Toit sê faktore wat op die ekonomie, huishoudelike finansies en verbruikersvertroue betrekking het, sal vir die toekomstige prestasie van die residensiële eiendomsmark belangrik bly. “Ekonomiese groei sal na verwagting in 2016 taamlik gedemp bly, met toenemende inflasionêre druk, onder andere as gevolg van ʼn verwagte styging in voedselpryse en ʼn daling in die rand se wisselkoers. Teen hierdie agtergrond sal rentekoerse na verwagting volgende jaar en in 2017 verder styg. Hierdie faktore sal huishoudelike finansies en die bekostigbaarheid van behuising en verbandfinansiering negatief beïnvloed.”

Hy sê nominale huisprysgroei van 5%-6% word vir 2016 in die vooruitsig gestel, met ʼn risiko dat dit laer kan wees, gesien teen die agtergrond van tendense en vooruitsigte in die ekonomie en die verbruikersektor. “Gegrond op die vooruitsigte vir nominale prysgroei en die inflasiekoers gemeet aan die gemiddelde verbruikersprysindeks, sal werklike groei in huispryse na verwagting in die volgende 12-18 maande onder geweldige druk wees.”

Die gemiddelde nominale waarde van huise in elk van die middelsegmentkategorieë was in November 2015 soos volg:

  • Klein huise (80m² – 140m²): R877 000
  • Mediumgrootte huise (141m² – 220 m²): R1 241 000
  • Groot huise (221m² – 400m²): R1 989 000

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161