Spaarmaand: Sό word jou beursie onwetend dunner

Woensdag, Julie 29th, 2015

Wanneer dit by vermorsing kom, is dit sowaar die klein jakkalsies wat die wingerd verwoes. Dikwels mors mens onwetend geld op items waarsonder jy eintlik kan klaarkom of waarvan daar ʼn goedkoper alternatief bestaan. Inge Strydom deel vandeesweek raad oor hoe mens kan verhoed dat jy geld op die “klein jakkalsies” mors.

  1. Wegneemetes en snoepgoed. Sodra jy die maandelikse koste van daardie cappuccino of wegneemete waaraan jy elke dag smul, bereken, sal dit ʼn bitter smaak in jou mond los – letterlik en figuurlik. ’n Wegneem-koffie of -cappuccino kan jou byvoorbeeld tot R20 uit die sak jaag. Maak maar gerus die som: R20 x 22 dae per maand = R440 per maand; R440 x 12 = R5 280 per jaar. Dis dalk tyd om weer daardie koffiefles wat jou ouma een Kersfees vir jou present gegee het, in te span.
  2. Koop in groot maat. Algemene kruideniersware kan dikwels teen ʼn laer prys in groot maak aangeskaf word. Kyk uit vir niebederfbare items of produkte met ʼn lang raklewe – veral wanneer daar spesiale aanbiedings op hierdie produkte is. As jy wonder of dit werklik goedkoper is om ʼn sekere item in groot maat te koop, werk uit hoeveel elke item individueel kos om sodoende te bepaal of jy werklik geld spaar.
  3. Elektriese toestelle wat baie krag gebruik. Waterverhittingstoestelle soos tradisionele geisers is een van die grootste elektrisiteitsvrate en kan jou onwetend baie geld uit die sak jaag. Dit kan redelik maklik met meer energiedoeltreffende opsies soos sonpanele vervang word. Daar is ook ander doeltreffende maniere waarop energie bespaar kan word, soos om byvoorbeeld LED-liggies te gebruik of om jou huis te isoleer eerder as om ’n elektriese verwarmer te gebruik. Laai Solidariteit en KragDag se selfhelpgids af vir nog wenke rondom die besparing van elektrisiteit. Klik hier.
  4. Hou jou oë oop vir goedkoper alternatiewe. Kan jy dalk ʼn goedkoper selfoonkontrak aangaan of bankkoste bespaar? Paul Joubert, senior ekonomiese navorser by Solidariteit, raai aan dat verbruikers wat bankkoste wil bespaar, nie net die verskillende banke met mekaar moet vergelyk nie, maar die rekeninge van elke bank. “Stel vas presies watter rekening jy tans het en wat die koste van dié rekening is,” sê Joubert. 

Moenie in hierdie inkopiestrikke trap nie:

  • Impulsiewe aankope. Almal besit ten minste twee of drie items wat hulle op die ingewing van die oomblik gekoop het en wat hulle nooit gebruik nie. Beplan alle aankope, van klere tot meubels, om onnodige aankope te voorkom.
  • Moenie honger gaan inkopies doen nie. Navorsing het bewys dat as jy op ʼn leë maag gaan inkopies doen, dit jou drang om goed te koop wat jy nie eintlik nodig het of kan bekostig nie, sal aanwakker.
  • Spesiale aanbiedings. Moenie jouself oorreed jy het iets nodig net omdat dit 50% afgemerk is nie. Vra jouself af of jy die spesifieke item oor ʼn jaar van nou af nog gaan gebruik – indien nie, sal jy waarskynlik daarsonder kan klaarkom.

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170