Onthaal sonder om jou spaarvarkie te slag

Vrydag, November 4th, 2016

Karen van der Berg

 

 

Die feestyd is op ons en dit beteken dis tyd vir jaar-eindgesellighede, Kerspartytjies en familiebyeenkomste het aangebreek.

Dit kan ’n mens ’n klompie geld kos. Gelukkig is daar maniere om vrolik te wees sonder om te veel te bestee. ’n Mens hoef jou darem nie na weggooi-tafeldoeke en grondboontjies te wend nie.

Ingrid Fourie, eienaar van Sweet Darlings, wat gesellighede vir kliënte beplan, het die volgende wenke:

  • Gebruik waspapier om temaborde vir versnaperings te bedek sodat jy die borde weer kan gebruik.
  • Skyfies kan voorgesit word in ongewone houers, soos leë blikkies, kartonhouers of selfs ou geskenkboksies. Voer dit net met waspapier uit. Plak ’n mooiprentjie daarop of tooi dit met linte en kant.
  • Pluk vars blomme uit jou of uit jou vriende se tuin. Dit kikker nie net ’n partytjie op nie, maar dit bespaar baie geld. Gebruik sommer herwinde bottels as blompotte en doen jou deel vir Moeder Natuur.
  • Koop by ’n materiaalwinkel lap vir ’n tafeldoek. Gebruik ’n uittandskêr om die materiaal te knip sodat dit nie rafel nie en gebruik die tafeldoek jaar ná jaar. Jy kan vir die prys van een gekoopte tafeldoek omtrent vier stukke lap koop.
  • Koop foeliekoekpanne of gebruik dié van ou gebak as ’n goedkoop koekstaander wat jy weer en weer kan gebruik. Draai dit met geskenkpapier toe en sit dit op ’n vaas waarin jy kleurryke lekkers, skulpies of selfs ’n blom sit. Eintlik kan jy enigiets plat toedraai, soos boeke. Dit sorg vir baie mooi en goedkoop versierings.
  • Partytjiegeskenkpakkies is ’n groot ding by veral kinderpartytjies. Koop eerder bruin papiersakke en deel die lekkergoed wat oor is vir die kinders uit om huis toe te neem.
  • Bespaar op die koek. ’n Eenvoudige vanilla-sponskoek kan pragtig wees as jy dit met iets mooi soos gesiggie-blommetjies, vlaggies of meringues versier.
  • Leer om jou eie uitnodigings te maak met programme wat op rekenaars te vind is. Jy kan dit e-pos of per Whats App stuur en dit sal baie geld en tyd spaar.
  • Stempel self jou papierservette: Stempels is oral beskikbaar en is ideaal as jy goedkoop servette, partytjiesakkies, koeverte of plekname wil opkikker.
  • Moenie die waarde van sosiale webwerwe soos Pinterest onderskat nie. Op hierdie webwerwe is daar derduisende idees om goedkoop te onthaal. Daar is letterlik nie iets onder die son wat nie op sosiale webwerwe te vind is nie. ’n Eenvoudige internet-soektog kan jou help om jou hele partytjie te beplan.
  • Laaste maar nie die minste nie: Skaal af. Ons het in die gewoonte verval om heeltemal oorboord met alles te gaan. Dit is nie nodig nie. Goeie geselskap, musiek en samesyn bly ten einde al wat nodig is om lekker te kuier.

 

 

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170