Neem beheer oor jou begroting tydens Feestyd

Dinsdag, November 22nd, 2016

Anja van den Berg

 

 

Die feestyd is die tyd wanneer die meeste mense wil ontspan, ’n bietjie vrye tyd geniet en hulself beloon vir al die harde werk wat hulle gedurende die jaar gedoen het. Uitspantyd beteken ontspanning, vermaak en besoeke aan restourante. Die gevolg is dat besteding in die meeste huishoudings toeneem. Voeg daarby die verpligte Kersgeskenke en vakansiepartytjies, en jou jaareindbonus lyk skielik baie kleiner as jou feesstemming.

Dis maklik om finansiële beheer te verloor. Daarom moet jy ’n plan beraam om skuld en uitgawes te verminder en geld te gebruik waarvoor dit absoluut noodsaaklik is. Hier volg vyf wenke oor hoe om te keer dat die feestelikhede omsit in ’n finansiële babelas in die nuwe jaar:

 

  1. Neem jou huidige finansies onder die loep

As jy jou finansies in orde probeer kry, reël ’n besoek aan ’n finansiële konsultant voordat jy vir Kersfees wegbreek, is die advies van die Finansiële Beplanningsvereniging. Jou finansiële plan moet verder as jou vakansiebesteding strek en moet doelwitte stel vir spaar, belegging en skuldvereffening en moet ook fiskale doelwitte vir die toekoms stel. Die finansiële berader kan ook jou bestedingspatrone en die emosionele drywers agter baie van jou finansiële besluite vasstel.  Sodoende sal die nuwe jaar heeltemal anders begin.

 

  • Stel ’n begroting vir Kersbesteding op

 

Stel ’n begroting vir jou Kersbesteding op – nie net geskenke nie, maar die bykomende besteding aan kos, drank en kuier, is die raad van die Open University. Maak hierdie Kersfeeselement van jou uitgawes deel van die res van die huishoudelike begroting sodat jy die algehele uitwerking van Kersbesteding op jou finansies oor ’n aantal maande kan bestuur.

 

  • Vermy aankope ter elfder ure

 

Die grootste slag vir jou begroting hierdie komkommertyd gaan die aankope ter elfder ure wees, waarsku Katie Lockwood, spesialisrekenmeester. “Om hierdie ongelukkige situasie te vermy, begin met ’n lys van almal vir wie jy iets moet koop, hetsy familie, vriende of kollegas. Skryf dan idees neer en gee ’n begroting vir elkeen … en hou daarby!”

 

  • Gebruik kontant pleks van kredietkaarte

 

Teen dié tyd weet jy dit seker al, maar kontantbetaling is een van die doeltreffendste maniere om ’n skuldbabelas in die nuwe jaar te voorkom. “As jy telkens ’n kredietkaart gebruik, is dit maklik om tred te verloor met wat jy koop, totdat die gevreesde rekeninge instroom,” sê Lockwood. As jy ’n kredietkaart gebruik, probeer die saldo ten volle te betaal wanneer jy die rekening in die nuwe jaar ontvang. Kredietkaarte is oor die algemeen ’n duur manier om geld te leen – en winkelkaarte is nog erger, omdat hulle gewoonlik hoër rentekoerse het.

 

  • Hou tred met die oplopende totaal

 

Hou jou besteding fyn dop deur die oplopende totaal op jou slimtoestel saam te stel of deur ’n app af te laai wat jou met jou begrotingsbestuur kan help.  “Daar is verskeie uitstekende begrotings- en beplanningsinstrumente wat gesinne kan gebruik om hulle besteding hierdie vakansie in bedwang te hou,” sê Anna Bahney, spesialisskrywer vir Forbes oor die kwessie van persoonlike finansies.  “Die rekeninge sal na Kersfees sonder enige twyfel instroom, maar jy sal dit makliker kan bestuur as jy weet wat jou maksimum bestedingsbedrae op elke kaart is.”

Die Feesgety is veronderstel om ’n vrolike tyd van die jaar te wees, vol vreugde en feesvierings. As jy goed beplan, kan jy ’n begrotingsbabelas in die nuwe jaar vermy wanneer die rekeninge instroom.

 

Bronne

 

Anna Bahney, 2014, “Holiday Budget Hacks”, Forbes/Personal Finance, http://www.forbes.com/sites/annabahney/2014/11/30/holiday-budget-hacks/

 

AMP, 2015, “7 ways to keep Christmas spending under control”, https://www.amp.com.au/news/2015/november/christmas-budget

 

Financial Planning Association, 2014, “9 Ways to Keep Holiday Spending Under Control”,

http://www.plannersearch.org/life-events/life-crises/credit-repair/budget-management/9%20Ways%20to%20Keep%20Holiday%20Spending%20Under%20Control

 

Reyna Gobel, 2015, “8 Tips To Help You Control Holiday Spending”, Investopedia, http://www.investopedia.com/articles/pf/08/speding-holiday.asp

 

The Open University, 2014, “10 Christmas spending tips: how to avoid a financial hangover in the New Year”, https://about.futurelearn.com/blog/10-christmas-spending-tips/

 

Wonga, 2015, “Avoid a financial hangover this festive season”, https://www.wonga.co.za/blog/avoid-financial-hangover-festive-season

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161