Motoriste kry groot verligting en ‘weer in Oktober’

Vrydag, Augustus 28th, 2015

Eugene Brink

 

Die prys van beide grade petrol sal met 69c per liter daal, terwyl die groothandelprys van diesel met ʼn swawelinhoud van 0,05% met 54c sal daal.

 

Met hierdie daling sal een liter 93-oktaan petrol in Gauteng vanaf 2 September R12,32 kos. Dit is 8,1% laer as die prys in September 2014, toe dit R13,41 gekos het.

 

Dit is welkome verligting vir vuisvoos verbruikers nadat April se petrolprysstyging van R1.59 die grootste ooit was en Maart s’n van 96c die tweede grootste.

 

Paul Joubert, senior ekonomiese navorser by die Solidariteit Navorsingsinstituut (SNI), sê die onlangse dalings in oliepryse se uitwerking was groter as die verswakking in die waarde van die rand teenoor die Amerikaanse dollar.

 

“Derhalwe is internasionale petroleumpryse, in rand geprys, steeds besig om te daal. Deur die loop van Augustus was die gemiddelde pryse van petrol en diesel internasionaal op vervaardigingsvlak, in dollar geprys, beduidend laer as wat dit gemiddeld gedurende Julie was. Die rand, wat in Augustus gemiddeld swakker was as in Julie, het egter nie genoegsaam verswak om hierdie prysdaling uit te wis nie. Dit volg dus dat plaaslike brandstofpryse, volgens die gepubliseerde formule, op 2 September moet daal.”

 

Volgens Joubert sal ʼn motoris sal met hierdie daling in September ongeveer R35 spaar op ʼn 50-liter petroltenk teenoor Augustus. Teenoor Julie se prys spaar ʼn motoris nou reeds R60 per 50-liter tenk petrol.

 

Hy sê tussen al die finansiële druk wat verbruikers beleef, is die prys van petrol tog ʼn positiewe faktor vanjaar. Gemiddeld van Januarie tot September is dit meer as 12% goedkoper as tydens dieselfde tyd in 2014.

 

“Dit is nog te vroeg om enige goeie voorspellings te maak, maar indien die huidige toestande deur die loop van September voortduur, kan plaaslike brandstofpryse in Oktober weer daal. Tans lyk ʼn daling van sowat 30c in Oktober moontlik, maar in die huidige wisselvallige toestande – die prys van olie het byvoorbeeld vandag weer skielik met byna 10% opgeskiet – sal hierdie voorspelling waarskynlik nog baie aangepas word totdat die aankondiging op 2 Oktober gemaak word.”

 

Internasionale petroleumpryse het onlangs hul laaste vlakke in ses jaar bereik en die Outomobiel- Assosiasie van Suid-Afrika (AA) het sy kommer uitgespreek oor die rigting van die olieprys wanneer dit die onderkant van die kringloop gaan bereik. “Indien en wanneer die olieprys verlangsaam, of styg, sal motoriste ten volle blootgestel wees aan die rand se broosheid,” het die AA in ’n verklaring gesê.

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161