Mediesefondse: Kry jy waarde vir jou geld?

Vrydag, September 30th, 2016

Binne die volgende paar weke sal mediese skemas hul jaarlikse opsiekeusevorms uitstuur wat jou die geleentheid bied om te ontleed of jou huidige opsie aan jou behoeftes voldoen.

Hier is ses aspekte om in gedagte te hou wanneer jy ʼn opsie kies:

 

Is ek verseker teen die onvoorsiene?

Die primêre doel van mediese dekking is versekering teen daardie groot, onvoorsiene mediese gebeurtenisse, soos ʼn motorongeluk of die geboorte van ʼn vroeggebore baba. Jy het dalk nie oor die afgelope jare ʼn groot eis gehad nie, maar wanneer dié groot gebeurtenisse plaasvind, kan dit tien- en selfs honderde duisende rand beloop.

Selfs indien jy fiks en gesond is, moet jy seker maak dat jy goeie hospitaaldekking het en dat jy verstaan wat daardie dekking voorsien.

Indien jou opsie ʼn perk plaas op hoeveel aan spesialiste uitbetaal sal word, oorweeg om mediese gapingsdekking (“gap-cover”) uit te neem wat die verskil tussen die mediese rekening en die bedrag wat jou mediese skema dek, sal betaal.

 

Watter tariewe betaal die skema aan algemene praktisyns, spesialiste en ander gesondheidsorgverskaffers?

Een van die belangrikste verskille tussen opsies is die tarief wat elkeen aan die mediesediensverskaffer sal betaal. Indien jou opsie slegs 80% van die medieseskematarief betaal, neem kennis dat jy, indien jou verskaffer meer as die medieseskematarief hef, vir die verskil aanspreeklik sal wees. Jy het die reg om ʼn kwotasie van jou mediesediensverskaffer aan te vra voordat jy ʼn prosedure ondergaan. Op dié manier sal jy weet of jy ʼn bykomende bedrag sal moet betaal en kan jy ook met die verskaffer onderhandel.

Sommige opsies kan ʼn bybetaling vir ʼn bepaalde prosedure vereis. Dit verlaag die premie, maar jy moet kennis neem van die bybetaling indien jy ʼn mediese prosedure benodig.

 

Het ek uitgebreide chroniese dekking nodig?

Voorgeskrewe Minimumvoordele (VMV) is minimumvoordele wat ingevolge wetgewing aan alle lede van mediese skemas voorsien moet word. VMV is ʼn stel van 270 mediese toestande, wat 27 chroniese  siektetoestande insluit. Indien jy ʼn chroniese toestand het, of ʼn familiegeskiedenis van ʼn chroniese toestand het wat nie deur die VMV gedek word nie, oorweeg om ʼn plan met uitgebreide voordele uit te neem.

Sommige planne gee korting op premies indien jy kies om jou chroniese medikasie deur ’n staatshospitaal te ontvang. Indien jy aan ‘n chroniese toestand ly, is dit ’n goeie manier om op medieseskemabydraes te bespaar.

 

Beplan jy om met ʼn gesin te begin?

Gradeer jou opsie vroegtydig op voor jy beplan om met ʼn gesin te begin, aangesien daar uitsluitings op kraamvoordele kan wees indien jy dit te laat byvoeg. In die algemeen moet jy nie wag totdat jy mediese dekking regtig nodig het voor jy dit reël nie, aangesien daar wagtye of uitsluitings ter sprake kan wees.

 

Het ek bo-drempelvoordele nodig?

ʼn Bo-drempelvoordeel is ʼn veiligheidsnet wat dekking verleen vir jou dag-tot-dag-uitgawes sodra jou mediese spaarplan uitgeput is en jy ʼn voorafbepaalde drempelvlak bereik het. Indien jy jonk en gesond is en geen kinders het nie, het jy dalk nie die bykomende dekking nodig nie aangesien jy nooit jou mediese spaarplan sal uitput of jou betalingsdrempel sal bereik nie. Nietemin kan jy vind dat jy die drempelvlak vinnig bereik sodra jy ʼn gesin begin. Dan sal die bo-drempelvoordeel jou ʼn noemenswaardige bedrag op mediese rekeninge bespaar, wat jy andersins uit jou eie sak sou moes betaal.

 

Is my dokter op die netwerk?  

Opsies wat toegang het tot netwerke van dokters of hospitale bied dikwels die voordeel van meer bekostigbare mediese dekking wat jou sak beter mag pas. In plaas daarvan om dit as keusebeperkend te ervaar, sien dit eerder as ʼn besparing terwyl jy toegang het tot die beste gehalte sorg. Maak seker watter gesondheidsorgverskaffers in jou omgewing deel is van die betrokke mediese skema wat jy oorweeg.

Sommige planne sal besoeke aan algemene praktisyns dek, selfs indien jou mediese spaarplan uitgeput is – solank hulle deel uitmaak van die algemene praktisynsnetwerk.

 

Bron: Liberty

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161