Maak Kersgeskenke minder

Dinsdag, Desember 13th, 2016

Karen van der Berg

 

 

Dit is al ’n cliché: jou kind speel soms lekkerder met die boks waarin die geskenk was as met die geskenk self. Elke Kersfees word ons (bevoorregte) kinders oorlaai met geskenke. Die nuutste selfoon, iPad, Kindle …of die een of ander foefie wat reeds maande voor Kersfees op TV geadverteer word. Daarsonder sal jou bloedjie immers ver afsteek by sy maats.

Die gevaar om jou kind met soveel geskenke te oorlaai, is dat jy selfsugtige kinders grootmaak. Só meen Mari Venter, ʼn opvoedkundige sielkundige van Pretoria.

“Kinders verwag dikwels hulle moet sekere aardse besittings kry, anders kan hulle nie funksioneer nie.” Sy het wenke vir ouers om hierdie Kersfees nie in die slaggat te trap nie.

  • Leer hom waardering. Jy kan jou kind se ingesteldheid self verander. Maak ʼn punt daarvan om jou kind te leer om kleiner dinge te waardeer. Prys hom van jongs af oor, byvoorbeeld, ’n mooi prentjie of geskenkie wat hy by die kleuterskool vir jou gemaak het. Dit laat hom trots voel en leer hom nie net materiële dinge wat jy in winkels koop, is waardevol nie.
  • Moenie jou kind beskuldig met aanmerkings soos: “Daar is baie ander wat nie eers ’n stukkie brood het om te eet nie.” Positiewe versterking is doeltreffender as straf of skuldgevoelens.
  • Moenie hom te veel bederf nie. Vra jouself eerder af hoekom jy die behoefte het om altyd vir jou kind die beste te koop. Het jy dalk swaargekry en nou probeer jy opmaak daarvoor?
  • Gee jou kind weekliks of maandeliks sakgeld. Hy ontwikkel dan ’n beter begrip vir die waarde van geld en leer dalk hoe onregverdig dit is om ’n duur geskenk te verwag. Laat hom Kersfees self geskenkies met sy sakgeld koop.
  • Gee jou kinders klein takies of verantwoordelikhede by die huis. Kinders kry ’n groter waardering vir tyd en opoffering as hulle leer om van hul tyd te gee. Hulle kan byvoorbeeld help om tafel te dek en af te dek, die skottelgoedwasser uit te pak of om die swembad skoon te maak.
  • Die grootste geskenk wat ons as ouers kan gee, is onverdeelde aandag, ’n oor wat regtig luister voor ons raas, iemand wat saam aan die tafel sit en eet, en veral volwassenes wat mekaar met respek en liefde hanteer.
  • Wys jou kinders deur jou gedrag hoe om op te tree. As jy wil hê hulle moet goeie maniere hê en respekvol en dankbaar wees, moet jý die voorbeeld stel. Behandel ander mense so en jou kind sal jou navolg.
  • Dring aan op goeie maniere, soos om dankie te sê as hulle iets kry, al is dit hoe klein. Leer hulle dit is ’n waardevolle lewensvaardigheid. As jy meer van jou kind verwag, kan jy meer uit hom kry.

 

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150