Kry só jou persoonlike begroting in orde

Donderdag, Junie 4th, 2015

Nico Strydom

 

ʼn Begroting is die enkele belangrikste stukkie gereedskap wat in enige huishouding se finansiële gereedskapskas moet wees.

Dit is volgens Francois Smit, besturende direkteur van Solidariteit Finansiële Dienste.  “Dit is waar die meeste mense kleitrap met hul finansies. Hul weet gewoonlik wat hul inkomste is, maar hou nie boek van hul uitgawes nie, en het ook geen beheer oor die uitgawes nie. Die begroting, as dit eers gedoen is, gee ook antwoorde oor ander finansiële sake wat aandag nodig het. Geen huishouding kan daarsonder nie.”

Volgens Smit is die eerste stap om te kyk of jy vir al die uitgawes op jou bankstaat verantwoording kan doen. Smit sê mense kom dan vinnig agter dat hulle byvoorbeeld drie keer in ʼn maand kontant getrek het, maar geen bewyse het van waar die geld heen is nie. “Jy neem die uitgawes en dokumenteer dit in ʼn gewone Excel-dokument, en druk dit uit as ʼn persentasie van jou netto-inkomste. Jy het meer as een maand se statistiek nodig om ʼn patroon raak te sien. Die proses gaan ook uitskieters uitwys, soos byvoorbeeld as jy een maand bande op jou voertuig moes sit.”

Smit meen dit is voordelig vir egpare om ʼn gesamentlike begroting te hê. “Die rede daarvoor is om uit die begroting  ʼn risiko-plan te kan opstel om sodoende die risiko’s wat kan ontstaan sou een van die gades iets oorkom, te identifiseer.” Volgens Smit hoef egpare nie noodwendig ʼn gesamentlike of spesiale bankrekening te besit om ʼn begroting aan te pak nie. “As die begroting reg aangepak word, weet elke gade watter verantwoordelikheid aan hom/haar toegedeel is, en kan dit met aparte bankrekeninge nog steeds goed hanteer word.”

Smit sê daar is nie altyd vaste riglyne om te bepaal hoeveel daar op ʼn spesifieke begrotingsitem, soos byvoorbeeld kruideniersware, bestee moet word nie. “Paaiementbetalings aan skuld is ʼn groot probleem. Dit is nie net skuld op bates soos ʼn huis of voertuie nie, maar eerder wentelkrediet, soos persoonlike lenings en kredietkaarte. Wat wel vas behoort te wees, is dat ʼn mens 10% tot 15% moet spaar, maar dit gebeur in baie min gevalle wel.”

Volgens Smit is daar hoop as jy sukkel om by ʼn begroting te hou. “Wees net eerlik. As jy meer uitgee as wat jy inkry, het jy groot probleme. As jy kruideniersware op skuld begin koop (kredietkaart), het jou probleme klaar begin. Die maklikste is om ʼn beleid te hê van geen kontant, geen aankope. Kry ʼn kredietkaart en oortrokke rekening uit jou lewe; dit verander mens se denke oor geld. Vestig ʼn gewoonte om te spaar. Die goue reël is dat jou begroting jou lewenstyl bepaal, nie dat jou lewenstyl jou begroting dikteer nie.”

Die Raad op Finansiële Dienste (FSB) meen daar is vyf belangrike stappe om te onthou wanneer jy jou begroting saamstel:

  1. Maak ʼn lys van al jou vaste onkostes/uitgawes. Hierdie is items wat elke maand dieselfde bly en waarvoor jy moet betaal, bv. skoolfonds, vervoer na en van die werk.
  2. Maak ʼn lys van al jou veranderende onkostes/uitgawes. Hierdie onkostes verander van maand tot maand, bv. kruideniersware, water en ligte.
  3. Bereken jou totale onkostes/uitgawes. Jou vaste uitgawes plus jou veranderende uitgawes gee vir jou die totale uitgawes.
  4. Bepaal jou totale inkomste. Dit is die totale bedrag tot jou beskikking vir jou maandelikse besteding.
  5. Vind uit of jy geld oor het om te bestee. Trek die kleiner bedrag van die groter een af. Indien jou uitgawes meer as jou inkomste is, beteken dit dat jy meer spandeer as wat jy verdien. Jy het geld oor indien jou inkomste meer as jou uitgawes is.

Die FSB gee ook die volgende waardevolle wenke:

  • Sit saam met jou gesin en stel ʼn volledige lys op van al die dinge wat julle benodig en begeer.
  • Stel ʼn maandelikse begroting op en hou daarby.
  • Betaal eers vir die dinge wat jy benodig.
  • Koop dan die dinge wat jy begeer.

 

Bronne:

Raad op Finansiële Dienste – https://www.fsb.co.za/Pages/Home.aspx

Solidariteit Finansiële Dienste – https://solidariteit.co.za/sfd/

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161