Klop die spanning van huiskoop

Donderdag, September 17th, 2015

Solette Swanepoel

 

Huiskoop is van die stresvolste dinge wat jy in jou lewe kan doen. Volgens ’n onlangse Britse opname is dit selfs méér stresvol as egskeiding, die dood van ’n grootouer, of bankrotskap. Presies die helfte van die deelnemers het gesê dat hulle ’n negatiewe ervaring met huiskoop gehad het.

Waarom is huiskoop so onaangenaam? Prokureurs wat sloer, die wete dat die koop enige tyd deur die mat kan val, die groot som geld wat op die spel is, baie papierwerk, en ’n eindelose hoeveelheid foonoproepe aan eiendomsagente, is blykbaar die vyf stresvolste aspekte van huiskoop.

Hoewel jy nie al die faktore van huiskoop kan beheer nie, is daar dinge wat jy kan doen om onnodige stres te voorkom:

 

  1. Spaar

Spaar soveel jy kan. Dit is Rhys Dyer, die uitvoerende hoof van ooba, Suid-Afrika se grootste fasiliteerder van huisleningfinansiering, se raad. Eerstens sal jy vir die deposito moet spaar. Min mense kry deesdae 100%-lenings, en boonop is dit wys om minstens ’n 10%-deposito te spaar. Nie net sal jy dan ’n beter rentekoers by die bank kan beding nie, maar jy sal ook makliker ’n lening kry en baie minder spanning ervaar.

 

Jy sal verder vir die registrasie- en oordragskoste, asook die verhuisingskoste moet begroot. Onthou dat daar ekstra maandelikse uitgawes soos erfbelasting, munisipale diensgelde en versekering gaan wees. Voorkom onnodige stres deur genoeg geld te spaar en vir al die bykomende uitgawes te begroot.

 

  1. Bestee minder as twee derdes van jou salaris

Banke sal nie sommer ’n lening toestaan tensy ’n derde van jou inkomste (voor aftrekkings) besteebaar is nie. Deur te beplan en te sorg dat jy minder as 66% van jou salaris bestee, kan jy ook baie spanning voorkom.

 

  1. Skuld en kredietwaardigheid

Adrian Goslette, die uitvoerende direkteur van RE/MAX van Suider-Afrika, beveel aan om ander skuld af te betaal voordat jy huiskoop oorweeg. Jou kredietgeskiedenis gaan ter sprake kom wanneer jy vir ’n lening aansoek doen, so moenie agterstallig met kredietpaaiemente raak nie.

 

  1. Weet waarvoor jy kwalifiseer

Een van die maniere om die onsekerheid van huiskoop te verminder, is om vooraf goedkeuring vir ’n lening te kry. Dan weet jy presies waarvoor jy kwalifiseer en teen watter rentekoers jy kan leen. Dit sal ook baie druk van jou afhaal as jy ’n verbandbemiddelaar gebruik. ’n Verbandbemiddelaar berei jou aansoek om ’n huislening voor en beding vir jou verbande by al die banke. Sodoende kan jy die banke vergelyk en ’n meer ingeligte besluit neem.

 

  1. Wees voorbereid

Maak alle nodige dokumente vooraf bymekaar sodat jy nie hoef te skarrel wanneer jy ’n aanbod op ’n huis wil maak nie. Jy gaan jou identiteitsdokument, bewys van inkomste, en drie maande se bankstate nodig hê.

 

Bronne:

 

Damien Gayle, 2014, “How buying a house is more stressful than bankruptcy, divorce and even the death of a loved-one, according to poll”, The Daily Mail, http://www.dailymail.co.uk/news/article-2690545/How-buying-house-stressful-bankruptcy-divorce-death-loved-one-according-poll.html.

 

Good House Keeping, [s.a], “Wil jy ’n huis koop?”, http://www.goodhousekeeping.co.za/af/family-relationships/setting-up-house/.

 

Hanlie Stadler, 2015, “Huiskoop 101: Skrop nes so pynloos as moontlik”, Netwerk 24, http://www.netwerk24.com/ontspan/2015-01-31-huiskoop-101-skrop-nes-so-pynloos-as-moontlik.

 

Property 24, 2015, “6 steps to buying your first home”, http://www.property24.com/articles/6-steps-to-buying-your-first-home/21290.

 

Property 24, 2015, “How to get ready to buy your first home”, http://www.property24.com/articles/how-to-get-ready-to-buy-your-first-home/22217.

 

Property 24, 2015, “Tips for a stress-free buying process”, http://www.property24.com/articles/tips-for-a-stress-free-home-buying-process/21457.

Ander Artikels

Skop vas en moenie onnodig koop nie
Anja van den Berg   Alles rakende jou supermark is bedoel om jou geld te laat bestee wat jy nie beplan het om te bestee nie, en selfs geld wat jy nie regtig hoef te bestee nie. Hoewel die meeste mense aan produkte dink in terme van die funksionele eienskappe daarvan – die instrumentele waarde […]
Agterbakse supermarktaktieke om jou onnodige goed te laat koop
Anja van den Berg   Het jy al ooit aanvaar dat iets ʼn winskoop is net omdat die prys in rooi geskryf is? Of besluit om daardie duur handsak of aktetas te koop omdat jy daarvan oortuig was dat jy dit verdien? Of ʼn hand vol ongesonde snoepgoed van die impulsrak gegryp terwyl jy toustaan […]
OTM-kaartruilslenters neem toe: Let op hiervoor!
Die Suid-Afrikaanse Bankrisiko-inligtingsentrum (Sabric) waarsku die publiek om op die uitkyk te wees te midde van die hoë voorkoms van OTM-kaartbedrog in die land. Die groep het gewaarsku dat daar weer ʼn “kaartruil”-skelmstreek in Suid-Afrika voorkom en ʼn uiteensetting van die betrokke skelms se modus operandi gegee om die publiek teen hul metodes te waarsku. […]
1 2 3 152