Kan jy bekostig om gemaklik af te tree?

Dinsdag, September 29th, 2015

“Net 6% van Suid-Afrika se bevolking sal eendag gemaklik kan aftree. Die res sal afhanklik van hulle kinders en die staat wees.”

Só sê Louis Botha, senior finansiële adviseur by Ou Mutual. Botha het meer as twintig jaar se ondervinding in die aftree- en versekeringsbedryf. Hy voorspel ʼn donker toekoms vir die land as Suid-Afrikaners nie dringend verantwoordelikheid vir hulle geldsake neem nie.

As ʼn jong, vooruitstrewende Suid-Afrikaner is jou oudag moontlik baie ver van jou gedagtes. Jy is tevrede met jou standaardpensioenfonds. Jy weet dit gaan dalk nie eendag watwonders uitbetaal nie, maar dis darem iets en jy troos jouself daaraan dat jy later, wanneer dit nodig raak, ʼn addisionele spaarplan sal uitneem. Klink dit bekend? As jy só dink, is jou finansiële welstand ná aftrede in groot gevaar.

Botha sê vir elke vyf jaar wat jy wag om jou pensioen met ʼn addisionele fonds aan te vul, verdubbel die bedrag wat gespaar moet word om eendag by dieselfde doel uit te kom. Daar is net twee veranderlikes wat die grootte van jou pensioen gaan bepaal –  tyd en die bedrag geld wat jy belê. Dis om dié rede dat mense aangemoedig word om sodra hulle begin werk vir hulle aftrede te begin spaar.

In die afreebeplanningsektor word daar gepraat van die 15:10:40-verhouding om aan mense die omvang van hul finansiële behoeftes met aftrede te verduidelik. Hiermee word verwys na 15% van jou salaris as premie, met ʼn moontlike 10% groei oor ʼn 40 jaar-termyn. Dit gesê, hoeveel jaar het jý oor om vir jou oudag te spaar?

As jy reeds ʼn aanvullende plan uitgeneem het, beteken dit steeds nie jou finansiële toekoms is veilig nie. Daar is verskillende programme en toepassings op die internet beskikbaar wat jou in staat stel om uit te werk of jy maandeliks genoeg geld wegsit, maar Botha sê dié hulpmiddels gee jou net ʼn aanduiding van jou situasie en is nie altyd akkuraat nie.

Gaan praat eerder met ʼn professionele adviseur, want aftreebeplanning is kompleks en deesdae “amper soos ʼn wetenskap,” sê Botha. “Dit bly die tipe beplanning waar die kliënt baie moeilik sonder hulp en leiding die regte besluite sal neem.”

Wanneer dit by jou geldsake kom, is net die beste finansiële raad goed genoeg. Maak seker jy klop aan by ʼn gevestigde maatskappy met ʼn goeie reputasie en “moenie by vreemde te-goed-om-waar-te-wees-skemas betrokke raak nie,” waarsku Botha. Hy beveel aan dat jy ook jaarliks jou plan by jou adviseur laat hersien, sodat dit aangepas kan word waar nodig.

Volgens Botha het mense in die afgelope twee dekades meer bewus geraak van aftreebeplanning. “Hulle is meer ingelig, maar ongelukkig is daar nog hopeloos te min mense wat aksie neem.”

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161