Jou kredietrekord en die koop van ʼn huis

Dinsdag, Desember 13th, 2016

Die meeste Suid-Afrikaners benodig finansiering om ʼn huis te koop en ʼn goeie kredietrekord is een van die eerste stappe in hierdie proses.

Dit is volgens Albertus van Staden, Hoof van Krediet by FNB Behuisingsfinansiering, wat sê ʼn huislening is gewoonlik een van die grootste beleggings wat jy in jou persoonlike hoedanigheid sal maak.

“Banke en finansiële instellings sal na jou persoonlike kredietprofiel kyk voordat hulle die finansiering sal toeken om jou huis te koop. Om te bewys dat jy jou skuldverpligtinge kan bestuur, is lewensbelangrik.”

Jou kredietrekord word by ʼn kredietburo gehou en word gebruik om te bepaal hoe waarskynlik dit is dat jy die geld sal terugbetaal wat jy benodig om jou huis te koop, sê hy.

Dit reflekteer enige kredietooreenkomste wat jy met goedgekeurde finansiële diensverskaffers het en verskaf besonderhede van die gereeldheid van betaling, enige betalings wat oorgeslaan is, agterstallige rekenings, en of daar enige veroordelings teen jou is.

Volgens die Nasionale Verbruikerswet moet kredietverskaffers van hierdie inligting gebruik maak wanneer hulle ’n kliënt se kredietwaardigheid assesseer.

Dit is uiters belangrik om rekenings betyds te betaal, elke keer, sê Van Staden. “As jy ʼn nalatige houding teenoor jou krediteure het, sal dit by die kredietburo reflekteer en mag beteken dat jy vir jou droomhuis sal moet wag.”

Van Staden stel voor dat jy jou kredietprofiel nagaan ʼn paar maande voordat jy vir jou huislening aansoek doen.

Jy word toegelaat om een keer per jaar jou kredietrekord gratis te assesseer en kan jou verslag ook teen ʼn minimale fooi by die kredietburo koop, sê hy. “Dit is ʼn goeie oefening om te sien of daar enige veroordelings teen jou naam gelys is, of of daar enige inligting is wat verkeerdelik gelys is oor jou terugbetalingsgedrag.”

As jou huislening afgekeur word, het jy die reg om by die huisleningverskaffer navraag te doen oor die rede. As dit aan die lig kom dat dit weens ʼn swak kredietrekord was, is daar ʼn paar dinge wat jy kan doen.

“Stel vas wat in jou kredietrekord daartoe gelei het dat die bank jou huislening-aansoek afgekeur het” sê Van Staden.

Soms is ʼn skuld ten volle afbetaal, maar reflekteer nog nie by die buro nie; jy moet die kredietverskaffer vra om dit op te dateer. Jy kan ook vra vir ʼn aflosbrief om te bevestig dat die skuld vereffen is as bewys aan die kredietverskaffer.

“As daar enige uitstaande betalings is wat jou rekord belemmer, is daar geen maklike manier om daarom te kom nie, maar kry jou verpligtinge so gou as moontlik op datum en sit jou soeke na ʼn huis op ys totdat dit gebeur,” sê Van Staden.

 

Bron: Acutts

 

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150