Huisprysgroei: SA klop meeste ander lande

Vrydag, Maart 11th, 2016

Eugene Brink

 

 

Suid-Afrika se residensiële eiendomsmark is stellig besig om laer prysgroei aan te teken, maar sy groei is eintlik nie sleg nie vergeleke met die meeste ander lande. In 2015 het hy heelwat beter as baie van sy ontwikkelende eweknieë asook ontwikkelde lande gevaar.

En in die res van die wêreld gaan dit ook relatief goed.

Die Knight Frank globale huisprysindeks het wêreldgroei in huispryse van 3% in 2015 aangeteken, heelwat meer as die 2,3% in 2014. “Kommer oor die probleme in die globale ekonomie het nie kopersvertroue ondermyn nie. Die laerentekoers-omgewing het eerder sentiment positief beïnvloed,” sê Kate Everett-Allen, skrywer van die verslag.

Volgens haar het altesame 43 uit die 55 eiendomsmarkte (78%) wat in die verslag ontleed is, prysstygings getoon.

Suid-Afrika beklee ’n stewige 18de posisie op dié lys met ’n prysgroei van 5,1% vir 2015. Dit is nie ver agter die VSA in die 17de posisie met 5,4% nie.

Suid-Afrika het China behoorlik die loef afgesteek. Die Middelkoninkryk beklee slegs die 43ste posisie en kon verlede jaar slegs groei van 0,4% aanteken namate sy ekonomiese groei skielik afgekoel het.

Suid-Afrika skop ook stof in die oë van die res van die Brics-groep (’n groep van groot ontwikkelende ekonomieë bestaande uit China, Rusland, Brasilië, Suid-Afrika en Indië). Brasilië beklee slegs die 40ste posisie met groei van 0,9%, Rusland is 46ste met -0,4% en Indië is in die 29ste posisie met groei van 3,9%.

Suid-Afrika het ook heelwat ryk lande soos Italië, Japan, Finland, Switserland, Nederland en die Verenigde Koninkryk se groei geklop.

En wie is dan eerste? Turkye, met fenomenale groei van 18% in 2015. Dié land word toenemend as ’n veilige skuilplek vir Midde-Oosterse beleggers gesien, dien as ’n brug tussen die Ooste en Weste en beleef sterk bevolkingsgroei, wat weer die vraag na eiendom laat toeneem.

Ander lande wat bo Suid-Afrika op die lys is, sluit in Nieu-Seeland (2de met 14,6% groei), Australië (4de met groei van 10,7%), Mexiko (10de met 6,7%) en Kanada (13de met 6,2%).

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170