Hoekom 30-jaar verbande nie die moeite werd is

Vrydag, Oktober 21st, 2016

In ʼn poging om hulle maandelikse verbandterugbetalings te verlaag mag baie voornemende kopers dit oorweeg om hulle verband oor 30 jaar te finansier.

Voordat hulle dit doen, is dit beter om die finansiële impak te oorweeg van die addisionele rente wat oor die langer termyn gehef word. Dit is volgens Adrian Goslett, streeksdirekteur en HUB van RE/MAX van Suider-Afrika, wat die meer tradisionele 20-jaar verband aanbeveel om onnodige rentebetalings te vermy.

“Baie potensiële huiseienaars mag na ʼn 30-jaar verband kyk as ʼn aantreklike opsie want die laer maandelikse terugbetalings laat dit aanvanklik meer bekostigbaar lyk. Terwyl die koper egter elke maand om en by 8.3% minder rente sal betaal, sal hy oor ʼn tydperk van 30 jaar 64% meer rente betaal as oor ʼn 20-jaar verbandtermyn,” sê Goslett. “Die besparings op die maandelikse verbandterugbetaling is nie genoeg om die massiewe bedrag van addisionele rente te regverdig nie.”

Hy voeg by dat huispryse oor die afgelope paar dekades ʼn opwaartse trajek getoon het, terwyl salarisse nie bygebly het nie. Om die eiendomsmark te betree het vir jonger generasies moeiliker geword, derhalwe is baie kopers geneig om ʼn langer-termyn verband-opsie te kies. Bekostigbaarheid is ʼn kwessie vir baie Suid-Afrikaners, wat gedwing word om maniere te vind om terugbetalings af te skaal om deur te kom; oor die langtermyn kom dit hulle egter duur te staan.

As ʼn koper ʼn huis vir R1 miljoen teen primakoers koop, wat tans 10,5% is, sal sy terugbetalings op ʼn 20-jaar verbandtermyn R9 984 wees. Indien die koper geen addisionele betalings op sy verbandrekening maak nie en die minimum paaiement oor die 20-jaar termyn maak, sal hy ʼn totaal van R2 396 112 terugbetaal, waarvan R1 396 112 rente is.

As die koper dieselfde eiendom oor ʼn 30-jaar verbandtermyn koop, sal sy maandelikse verbandterugbetalings R9 147 wees. As hy geen ander betalings behalwe die maandelikse paaiement maak nie, sal hy ʼn totaal van R 3 293 061 terugbetaal. In hierdie geval is die rente oor die termyn betaal R896 949 meer.

“As die geld wat op die maandelikse terugbetaling gespaar word, gebruik word om ander korttermyn-skulde te betaal of bestee word op ʼn rentevrye belegging met ʼn hoër opbrengs as die aanvanklike rente betaal op die langer-termyn verband, mag dit die moeite werd wees. As die geld egter elke maand op verbruiksgoedere bestee word, sal die koper op die lang duur in ʼn baie erger finansiële posisie wees,” sê Goslett. “Voornemende kopers mag oortuig word om die 30-jaar verband te kies weens die waargenome korttermyn-wins, maar die akkumulatiewe effek op die addisionele 10-jaar tydperk moet versigtig oorweeg word voordat enige finale besluit geneem word. Dit is noodsaaklik dat die voor- en nadele deeglik opgeweeg word en ʼn ingeligte besluit geneem word.”

Volgens Goslett, as ʼn koper sy huis met ʼn 30-jaar verband gekoop het en sy finansiële posisie verander, moet hy, as hy dit kan bekostig, meer op sy verband betaal. Dit sal die termyn van die lening en algehele rente betaalbaar verminder. “Ongeag die termyn van die lening, word rente slegs gehef op die uitstaande balans van die verband.  Indien die koper dus meer betaal as wat hy kontraktueel verbind is om te doen, sal hy die totale rentebedrag betaalbaar afbring en terselfdertyd die leentydperk verkort,” verduidelik Goslett.

Hy sluit af deur te sê dat daar min situasies is waar ʼn langer-termyn lening finansieel voordelig sou wees. Kopers moet daarom, voordat hulle gelok word deur ʼn laer maandelikse terugbetaling, hulle langtermyn finansiële posisie oorweeg.

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161