Hoe om te bespaar op huisinhoudversekering

Dinsdag, Oktober 4th, 2016

Met e-tol en inflasie soek ons almal na maniere om elke maand ʼn bietjie ekstra te spaar. Soms beteken dit bietjie minder uiteet, goedkoper sjampoe of wag totdat die jongste lokettreffer op DVD beskikbaar word in plaas van bioskoop toe te gaan.

Soms beteken dit ook dat jy jou huis nou moet opgradeer ten einde op die lang duur baie meer te bespaar.

Jou huisinhoudversekeringspolis is nie iets wat jy ooit moet oorweeg om te kanselleer nie. Kyk eerder na sommige van die goed wat jy kan doen om elke maand minder vir jou huisinhoudversekering te betaal en verbeter jou huis se veiligheid terwyl jy nou hiermee besig is.

 

  1. Kies ʼn veiliger voorstad

Vir dié van julle wat woon in die huis wat al vir drie geslagte in die familie is, is dit natuurlik nie ʼn opsie nie. As jy egter ʼn huurder is of van plan is om binnekort te trek, is dit die moeite werd om die misdaadstatistiek van verskeie areas te vergelyk om een te kry wat aan jou behoeftes voldoen ten opsigte van gerief en prys maar ook ʼn relatief lae misdaadsyfer het. Die area waar jy bly en sy misdaadstatistiek word in ag geneem by die berekening van die maandelikse premie vir jou huisinhoudversekering.

 

  1. Kry ʼn alarm

As jy lekker knus is waar jy nou is en nie regtig wil trek nie, is die installering van ʼn alarm (een wat ook met ʼn gewapendereaksiemaatskappy verbind is) een van die beste maniere om die sekuriteit van jou huis te verbeter. Ja, daar is wel die koste van die alarm waarna jy moet kyk, maar jy doen meer as om bloot jou huis op te gradeer. Met ʼn alarm sal jou maandelikse versekeringspremie minder wees en jou gesin sal beter beskerm wees.

 

  1. Kry ʼn elektriese heining

En maak seker dat jou heining ook met ʼn alarm en ʼn sekuriteitsmaatskappy verbind is. Dis nog ʼn vanselfsprekende uitgawe wat op die lang duur vir jou baie gemoedsrus gaan koop, veral as jy van plan is om kinders te hê. Baie mense hou nie van elektriese heinings nie want hulle voel dat dit hul huis se voorkoms bederf en dit soos ʼn tronk laat lyk, maar jy kan ook bewegingsdetektors buite (en binne) jou huis laat installeer. Albei hierdie misdaadbestrydingstegnieke sal jou maandelikse premie minder maak en dit sal jou iets mooier gee om na te kyk elke maand.

 

  1. Kry sekuriteitshekke en diefwering

Sekuriteitshekke en diefwering is waarskynlik een van die bekostigbaarste maniere om die sekuriteit van jou huis op te gradeer. Maak seker dat jy ʼn geakkrediteerde maatskappy gebruik om jou diefwering te installeer want die skelms is baie meer gedetermineer en vindingryk as wat jy dink. Aangesien dit ʼn eenmalige uitgawe is, kan jy net so wel seker maak dat dit reg gedoen word sodat jy snags rustig kan slaap.

 

  1. Moenie die bedrag verminder waarvoor jy gedek is nie

Dit kan baie aanloklik wees om net al die goed waarvan jy hou in jou huis vir minder te verseker, maar onthou dat jy op die ou end onderverseker kan wees en dat dit jou hard kan tref as jy die slag moet eis. Onthou dat dit altyd beter is om oorverseker eerder as onderverseker te wees. Gebruik ons handige inventarisvorm om seker te maak dat jy alles gedek het.

 

Bron: KingPrice Insurance

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161