Hoe om belasting op jou huur-eiendom te spaar

Woensdag, November 23rd, 2016

Almal weet daar is meer daaraan toe om ’n huur-eiendom te besit as om ’n huurder te vind en huurgeld in te vorder – maar die een ding wat die meeste privaat eienaars vergeet om te doen is om rekord te hou vir inkomstebelastingdoeleindes.

Om die waarheid te sê, baie privaat eienaars besef nie eers nie dat as jy een of meer huur-eiendomme besit, die SA Inkomstediens (SAID) van jou vereis om jou uitgawes en winste te bereken – en om belasting om jou winste te betaal, sê Andrew Schaefer, besturende direkteur van Trafalgar, ’n nasionale eiendomsbestuurmaatskappy.

“Die meeste eienaars dink hulle kan watter huur hulle ook al ontvang, behou sonder enige verwysing na die SAID, veral as hulle net-net gelyk breek op hulle huur-eiendomme, maar dit is eintlik ’n oortreding van die Wet op Inkomstebelasting. Die SAID sê dat selfs geld wat ontvang word vir die dan en wan uithuur van ’n vakansiehuis of vir die uithuur van ’n kamer of ’n kothuis op jou eiendom deel uitmaak van jou inkomste en aan die Ontvanger verklaar moet word, of jy kan jouself in baie warm water bevind.”

Aan die ander kant, merk hy op, moet eienaars van huur-eiendom ook daarvan bewus wees dat sekere uitgawes wat aangegaan word met die uithuur van eiendom van die bruto-huurgeld afgetrek kan word om die werklike wins te bepaal en die belasting betaalbaar kan verminder.

Volgens die SAID sluit hierdie uitgawes munisipale dienstegeld en belasting in, die rente betaal op die verband op die eiendom, die koste van advertering vir nuwe huurders, die fooie betaal aan die agent, die koste van herstel en instandhouding en die koste van tuin- en veiligheidsdienste.

“Eienaars wat hierdie uitgawes eis, sal egter bewys moet inhandig in die vorm van fakture, kwitansies en state van hulle banke en versekeringsmaatskappye, en hulle moet hierdie stawende dokumente aan die begin van die finansiële jaar op lêer begin hou. Hulle moet ook daarvan bewus wees dat hulle nie BTW mag vra op die huurgeld wat hulle ontvang nie, of BTW mag eis op enigiets wat hulle op die eiendom bestee nie.”

Schaefer sê dat uitgawes op verbeterings aan die huur-eiendom, soos die byvoeging van ’n motorhuis of nog ’n slaapkamer, nie geëis kan word teen die huur-inkomste wat ontvang is nie, maar kan ingesluit word in die basiese koste van die eiendom om die eienaar se aanspreeklikheid vir belasting op kapitale winste effektief te verminder as die eiendom ooit verkoop word.

“Intussen is ons advies aan eienaars wat nie hulle huur-inkomste in vorige belastingtydperke verklaar het nie, om die SAID so gou as moontlik te nader en te ‘bieg’, eerder as om te wag en sien of – of eerder wanneer – hulle uitgevang sal word.

“Om die direkte benadering te neem mag selfs lei tot ’n vermindering van die boetes en rente wat die SAID op onbetaalde belastings kan hef, en dit sou sekerlik beter wees as om te wag totdat jy besluit om die eiendom te verkoop en dan gekonfronteer te word met ’n reuse belastingrekening voordat jy dit na die nuwe eienaar oordra.

“Ons beveel egter aan dat jy ’n rekeningkundige of betroubare belastingkonsultant se hulp inroep om dinge op te klaar, of selfs om die SAID namens jou te nader, en om te verseker dat jou netto huur-inkomste behoorlik bereken en in toekomstige belastingopgawes verklaar word.”

 

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150