Gebruik só minder water

Vrydag, November 18th, 2016

Marli Naidoo

 

 

Mense gebruik heelwat water: om te drink, kos te kook, wasgoed te was, kos te groei, en selfs om klere, karre en rekenaars te maak.

Tydens die vervaardiging van een motorvoertuig word 303 000 liter water gebruik; vir ’n fiets, 1 890 liter; en vir een vel A4 papier, 10 liter water. Elke mens het ’n watervoetspoor. Dit is die hoeveelheid water wat ons daagliks gebruik. Ons moet almal probeer om hierdie voetspoor so klein as moontlik te hou. Elke druppel wat bespaar word, dra by om droogte-nood te help voorkom. Dan is daar natuurlik ook die bykomende voordeel van ‘n kleiner maandelikse waterrekening.

 

Kom ons kyk na maklike maniere om minder water te gebruik:

Die emmer is ‘n wonderlike ding. Gebruik drie tot vier liter in ‘n emmer om jou toilet te spoel. ’n Outydse toilet kan tot 13 liters water gebruik met elke spoel, en selfs ’n toilet met ultra-lae-vloei gebruik 6 liters water op ‘n slag.

Moenie jou badwater vermors nie. Hou dit om jou toilet mee te spoel en jou tuin nat te lei. Dit is egter beter om te stort. Wanneer jy bad, kan jy tot soveel as 260 liters met die pyp afstuur, waar jy tydens ’n vyf-minute stort tussen 37 en 94 liters dieselfde pad laat volg. Terwyl jou stortwater warm word, kan jy die koue water in ’n emmer opvang om ook vir ander gebruike aan te wend.

Was jou skottelgoed in ’n kleiner skotteltjie in jou wasbak, en gooi daarna die water op jou plante. Jy kan ook groente en vrugte in so ’n skotteltjie afspoel in plaas daarvan om dit onder lopende water te doen.

Draai die kraan toe terwyl jy tande borsel of skeer.

Nadat jy jou groente gestoom het, of pasta gekook het, hou sommer die afgooi-water ook vir jou toilet of tuin.

Moenie daardie druppende kraan of lopende toilet oorsien nie. Maak hulle sommer so gou as moontlik reg.

Hou drinkwater in die yskas, sodat jy nie elke keer die kraan laat loop vir koue water wanneer jy dors word nie.

Moenie ’n hele ketel vol water kook vir een koppie tee nie.

Wag totdat jou wasmasjien vol wasgoed is voordat jy dit aansit.

Maak seker dat jy jou elektriese skottelgoedwasser goed ken. Met sommige modelle hoef jy nie meer jou skottelgoed voor die tyd af te spoel nie. Maak ook seker dat jy die skottelgoed reg inpak, anders gaan jy heel moontlik nog water na die tyd moet gebruik om halfgewaste borde heeltemal skoon te kry.

Was jou voertuig met ’n emmer vol water in plaas daarvan om ’n tuinslang te gebruik.

Lê pype aan wat water direk vanaf jou wasbakke, stort en bad weglei tot in jou tuin.

Daar is heelwat waterbesparingstoestelle beskikbaar wat jy in en om jou huis kan installeer.

Saam kan ons ’n verskil maak. Selfs een klein aanpassing of verandering kan ’n verskil maak as dit in elke huis gebeur.

 

Bronne

Breyer, M. 2015. “11 clever ways to conserve water at home”. Treehugger, http://www.treehugger.com/green-home/11-clever-ways-conserve-at-home.html

Royal borough of Greenwich. 2016. “Tips to reduce water usage”. http://www.royalgreenwich.gov.uk/info/880/energy_-_efficiency_advice_and_assessment/689/help_save_water

Water footprint network. 2016. “What is a water footprint?”. http://waterfootprint.org/en/water-footprint/what-is-water-footprint/

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161