Dís hoe beurtkrag jou kragrekening opstoot

Donderdag, Augustus 27th, 2015

Eugene Brink

 

Het jy gedink beurtkrag spaar jou geld omdat jy mos nie krag tydens daardie periodes verbruik nie?

 

Dink weer, want daardie ure se beurtkrag – en die gevolglike heraansluiting van die krag – kos jou in der waarheid meer as wanneer die krag bloot aan sou bly.

 

Charmaine Kupfer, bestuurder van Genlet Properties, wat deeltitelkomplekse op die Wes-Rand bestuur, sê verbruikers verstaan nie aldag hoe hul krag bereken word en wat hul verbruik en kostes beïnvloed nie. “Verbruikers se kragrekening bestaan uit twee komponente, naamlik die vaste komponent en die eenhede wat verbruik word. ’n Verbruiker van krag kan gedefinieer word as ’n private indiwidu of ’n deeltitelkompleks met verskeie wooneenhede, maar wat slegs een sentrale kragmeter het wat deur die munisipaliteit gelees word.”

 

Sy sê die vaste komponent op die rekening fluktueer na gelang van die maksimum aanvraag. “Maksimum aanvraag is die hoeveelheid krag wat tydens ’n bepaalde tydgleuf verbruik word. Die maksimum aanvraag is aansienlik hoër tussen 16:30 en 20:30 saans, asook soggens tussen 05:00 en 08:30.

 

“As ’n verbruiker se totale kragverbruik oorwegend in hierdie spitstye val – soos ’n gesin s’n – beteken dit die verbruiker se rekening is outomaties op ’n hoër maksimum aanvraag-kerf as ’n verbruiker wie se profiel die omgekeerde daarvan is – soos ’n student, sakepraktyk of enkellopende persoon.”

 

Volgens haar het die Nasionale Energiereguleerder (Nersa) ’n basiese riglyn vir die verbruik van eenhede tydens spitstye. “Indien die verbruik hierdie perk oorskry, word indiwidue/komplekse dienooreenkomstig gepenaliseer.”

 

Dit is waar die beurtkrag se invloed skadelik raak. “Indien ’n kompleks of indiwidu se krag gedurende spitstye ná beurtkrag aangeskakel word, veroorsaak dit ’n skielike toename in verbruik. Dit plaas die verbruiker dan outomaties op ’n hoër maksimum aanvraagkerf.

 

“Dit bring mee dat die verbruiker ervaar dat, hoewel sy krag byvoorbeeld vyf keer vir ’n gemiddeld van vier uur per slag in ’n gegewe maand af was, sy rekening hoër is as in maande van geen beurtkrag.”

 

Hoe kan jy jou kragverbruik reguleer en die skadelike impak van beurtkrag teenwerk? “Eerstens behoort verbruikers navorsing te doen oor watter toestelle baie krag verbruik. Lugverkoelers, stowe, oonde, geisers, tuimeldroërs, skottelgoedwassers, wasmasjiene en selfs strykysters verbruik almal baie krag.”

 

“Skakel ook jou hoofskakelaar tydens beurtkrag af en hou dit af vir 10 tot 20 minute nadat die toevoer weer aangeskakel is. Dit sal nie net skade aan jou elektriese toestelle voorkom nie, maar ook verhoed dat jy op ’n hoër maksimum aanvraagkerf aangeslaan word.”

 

Volgens Kupfer is die reserwekrag (“standby power”) ook ’n kragvampier. “Reserwekrag na elektriese toestelle soos TV’s en selfoonherlaaiers kan tot 25% tot ’n kragrekening bydra.”

 

Laastens raai sy verbruikers aan om toestelle soos geisers en elektriese stowe juis tydens spitstye af te skakel. “Dit kan ’n wesenlike verskil op jou kragrekening maak. Buite spitstye is die verskil soms klein.”

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161