Die beste manier om geskille oor huurdeposito’s te vermy

Vrydag, November 18th, 2016

Meningsverskille oor sekuriteitsdeposito’s is waarskynlik die grootste oorsaak van wrywing tussen verhuurders en hulle huurders – maar dit hoef nie so te wees nie as albei partye net ’n paar basiese riglyne volg.

So sê Greg Harris, HUB van Chas Everitt Property Rentals, en hy merk op: “Die deposito is veronderstel om die verhuurder te beskerm teen enige skade wat die huurder gedurende die termyn van die huurkontrak veroorsaak, en teen verlies van huurgeld of munisipale diensheffings as die huurder nie betaal nie.

“Aan die ander kant, as jy ’n huurder is wat altyd jou huurgeld op tyd betaal en die eiendom skoon en in ‘n goeie toestand hou, moet jy daarop kan reken om jou hele deposito terug te kry aan die einde van die huurkontrak. En jy mag natuurlik nie gepenaliseer word vir skade wat deur ‘n vorige huurder aangerig is nie.

“Maar dinge werk alte dikwels nie so uit nie, wat daarop dui dat albei partye meer aandag aan die toestand van die eiendom en die bepalings van die ooreenkoms moet gee voordat die huurkontrak geteken word.”

Om te begin, sê hy, bepaal die Wet op Huurbehuising dat die verhuurder en die voornemende huurder saam ’n “ingaande” inspeksie moet doen voordat die huurder die eiendom okkupeer, ten einde enige vooraf bestaande skade te bepaal en te dokumenteer sodat daar nie in ’n later stadium van die huurder vereis kan word om daarvoor te betaal nie.

“Die Wet bepaal ook dat ’n ‘uitgaande’ inspeksie gedoen moet word binne drie dae nadat die huurder om enige rede uitgetrek het, en dit is natuurlik ook beter as dit gesamentlik gedoen word. In die praktyk gebeur dit egter dikwels dat die huurder nie teenwoordig is nie, en dit maak dit nog belangriker dat die aanvanklike (ingaande) inspeksie deeglik gedoen word.”

Harris sê aspekte vir besondere aandag moet die volgende insluit:

•Deurslotte – Draai hulle maklik, is dit vervang sedert die vorige huurder weg is en het almal sleutels?

•Vensters – Maak almal behoorlik toe en het almal handvatsels en glybane? Is daar gekraakte ruite? Het almal diefwering waar nodig?

•Mure – Is daar merke, skrape of barste? Is die verfwerk skoon en netjies?

•Plafonne – Is dit gelyk? Is daar tekens van ’n lekkende dak of geiser?

•Loodgieterswerk – Is al die krane reg? Is daar enige lekplekke (kyk onder die kombuiswasbak) en is die afvoerpype oop?

•Muur- en vloerteëls – Is alle teëls stewig vas en sonder skade? As daar vloerlyste is, is almal op hulle plekke?

•Matte – Is dit geskeur, verslete, gebrand of gevlek?

•Sekuriteit – As daar elektriese hekke of deure is, werk almal? Is al die afstandbeheertoestelle beskikbaar?

•Skoonheid – Is die stoof skoon? Is die toilette gevlek? Is daar skimmel in die stort?

 

“As al hierdie besonderhede akkuraat aangeteken en indien moontlik gefotografeer is, en as die lys dan deur die huurder en die verhuurder onderteken en by die huurkontrak aangeheg is, behoort daar min ruimte vir latere meningsverskil te wees.

“Verhuurders moet ook seker maak dat hulle bestuursagent by die Raad op Eiendomsagentskapaangeleenthede geregistreer is, anders loop hulle die risiko dat die agent met die huurders se deposito’s verdwyn en die verhuurders dan die deposito’s en rente uit hulle eie sak sal moet betaal aan die einde van die huurkontrak.”

 

 

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150