Huis koop: Deposito of 100% verband?

Donderdag, Julie 28th, 2016

Daar is baie voordele verbonde daaraan om ʼn deposito neer te sit vir jou eerste huis, maar in vandag se taai ekonomiese klimaat mag dit meer realisties wees om ʼn 100% verband uit te neem. Hoe besluit jy wat die beste vir jou sal wees?

Volgens Christa Schimper, streeksverkoopbestuurder by ooba, Suid-Afrika se grootste verbandskepper, is daar ʼn toename in eerste-keer huiskopers, wat tradisioneel nie maklike toegang tot ʼn deposito het nie. Daar is ook ʼn klein toename in banke wat 100% verbande toestaan.

“Neigings toon dat 53,2% van alle aansoeke wat deur ooba ontvang word van eerste huiskopers afkomstig is, so dit is noodsaaklik dat hierdie kandidate hulle finansiële situasie evalueer alvorens hulle vir ʼn huislening aansoek doen,” sê Schimper.

 

Die belangrikheid van ʼn deposito

 

Sy sê dat eiendomsagente en verkopers meer vertroue in ʼn voornemende koper het wat oor ʼn deposito beskik. Die koper se kanse om ʼn verband goedgekeur te kry is hoër, so sy/haar aanbod is aantrekliker as dié van ʼn koper wie se aanbod onderworpe is aan die voorwaarde dat ʼn ander eiendom eers verkoop moet word of die verkryging van ʼn 100% verband.

Daarbenewens sal banke faktore soos inkomste, besteebare inkomste, kredietrekord, ouderdom, lengte van tyd wat applikant in sy/haar huidige werk is en die grootte van sy/haar deposito in ag neem wanneer hulle dit oorweeg om ʼn huislening toe te staan al dan nie.

Hoe groter die deposito, hoe kleiner is die risiko vir die bank wanneer ʼn huislening toegestaan word, en die huiskoper spaar meer oor die verbandtermyn.

Banke sal ook waarskynlik oop wees vir onderhandeling oor die rentekoers, want hulle neem ʼn laer risiko met ʼn deposito. “Deur kapitaal dadelik in die huiskoopproses neer te sit, word die bedrag wat op die eiendom verskuldig is, verminder, en dus word ʼn kleiner deposito vereis, wat die bedrag rente verskuldig beduidend verminder,” sê Schimper.

Indien ʼn huiskoper byvoorbeeld ʼn R1 000 000 eiendom met geen deposito koop teen ʼn 9.25% rentekoers, sal hy/sy R9 158.57 per maand oor 20 jaar betaal. Aan die einde van die verbandtermyn sal hy/sy R2 198 080.40 terugbetaal het.

Aan die ander kant, met ʼn R100 000 deposito sal die maandelikse terugbetalings R8 242.80 wees en die totale terugbetaling R1 978 272.36. As die deposito hierby gevoeg word, kom die totaal steeds te staan op slegs R2 078 272.36 – wat die totale terugbetalings R119 808.04 goedkoper maak as om sonder ʼn deposito te koop.

“Die voorbeeld van R119 808 is ʼn beduidende besparing,” sê Schimper. “Deur ʼn deposito neer te sit, sal jy dit vermy om rente op daardie bedrag oor 20 jaar te betaal.”

 

En as jy nie die kontant het nie?

 

Natuurlik het almal nie ʼn gesonde bankbalans wanneer hulle begin huis soek nie.

“As jy nie ʼn deposito kan neersit nie, sal ʼn 100% lening jou steeds toelaat om vir jou eie eiendom te betaal in plaas daarvan om te huur. Soms mag die neersit van ʼn deposito selfs jou vermoë kompromitteer om genoeg fondse te hê vir oordrag- en registrasiekoste. Dit mag beteken dat jy aansoek moet doen vir addisionele finansiering en terugbetaling teen ʼn hoër rentekoers in die gesig staar.”

Om ʼn idee te kry van watter eiendomsprys bekostigbaar is en die waarskynlike moontlikheid om vir ʼn huislening goedgekeur te word, stel Schimper voor dat voorlopige kwalifisering by ʼn verbandskepper verkry word. Sodra jy dan ʼn aanduiding het van die deposito wat benodig word, is jy in staat om die beste benadering te oorweeg wat benodig word om die geld te bekom.

“Jy kan ook ʼn korttermynlening van tot soveel as R150 000 uitneem om die deposito te befonds,” sê Schimper. “Dit beteken natuurlik dat jy rente op daardie lening betaal, en dit mag jou korttermynkontantvloei verminder, maar dit kan ʼn reuse verskil maak aan jou kanse om goedgekeur te word.”

Voornemende huiskopers kan ook by familielede aanklop vir ʼn lening met ʼn voorkeur-rentekoers of dit oorweeg om die eiendom saam met ʼn vennoot te koop wat kan help om die deposito te finansier.

“Hierdie ooreenkomste moet sorgvuldig gedokumenteer word om enige latere verwarring te voorkom, maar om die lening met ʼn vennoot of familielid te deel kan die finansiële las aansienlik verlig,” sluit sy af.

 

  • Alta

    Ten spyte daarvan dat ons oor 10% deposito beskik het en ook genoeg kontant vir die oordragskoste gehad het, kon Ooba nie daarin slaag om vir ons ‘n verband by 3 van die grootste banke goedgekeur te kry nie. Volgens hulle ‘bond calculator’ het ons gekwalifiseer. Ons kredietrekord is skoon en al skuld was n kleinerige motorpaaiement. Ons het toe self by die 4de bank, die groen ene, aansoek gedoen en binne 4ure is ons verband goedgekeur. Ons vermoed die verkeerde syfers oor inkomste of uitgawes is by die ander banke ingedien.Doen liewer self jou verbandaansoeke as jy n lening wil hê.

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150