Dawie Roodt: ‘Spaar, spaar, spaar’

Maandag, Mei 25th, 2015

Therien Roodt

 

Is jy altyd besig om die bitter pil van finansiële probleme te sluk?

In die samelewing van vandag is geld altyd ’n groot bekommernis. Inflasiekoerse, petrolpryse, kospryse en dies meer is besig om die wêreld te verower. Dit maak dat ‘n mens net nie kan byhou nie.

Die ekonoom Dawie Roodt gee die volgende advies oor geldvrae:

Is spaar werklik die beste keuse vir my en my gesin?

Mense is geneig om daardie geld wat in hul beursies brand, uit te gee – soms op onnodige onbenullighede. Volgens Roodt is die beste opsie spaar, spaar, spaar – maak nie saak hoe groot die versoeking is om daardie mooi rooi rok te koop nie.

Hy gebruik die volgende voorbeeld om sy argument te staaf: “Gestel jy oes vandag 100 sakke mielies en jy gebruik nie dadelik alles nie. Jy bêre 10 sakke in die stoor om in die toekoms te gebruik. Die teenoorgestelde van spaar is wanneer jy jou eie 100 sakke gebruik én nog 10 by die buurman leen om dadelik te gebruik. Met ander woorde, jy gebruik in die toekoms in.”

Spaar word dikwels gesien as ’n manier om kapitaal op te bou. Daar kan op baie maniere gespaar word.

Omdat die lewe vandag so duur is, is talle mense onseker of dit beter sal wees om ’n huis te huur of te koop. Roodt lê klem daarop dat verskeie faktore in ag geneem moet word voordat daar ’n finale besluit geneem kan word. Jy moet in elk geval êrens bly, dit is dus nie ’n slegte idee om ’n huis te koop in plaas van te huur nie. Rentekoerse moet egter ook in ag geneem word deur daarop te let of die rentekoerse hoog of laag is.

Volgens Roodt geld dieselfde vir huispryse: Is dit hoog of laag? Besluit of jy vir ’n lang of ’n kort tydperk in die huis gaan bly. Oordrag- en registrasiekoste is baie hoog. As jy dus gou weer gaan verhuis, maak dit nie sin om te koop nie.

Wat is die beste manier om skuld af te betaal?

Skuld word menigmaal gesien as ‘n euwel. Dawie sê dat jy dadelik moet ophou om in die toekoms in te gebruik. Raak ontslae van onmiddellike bevrediging.

Fokus daarop om geld te bestee wat jy nou moet uitgee, maar wees bereid om op die langtermyn geld weg te bêre.

Wanneer jy van skuld ontslae wil raak, is dit noodsaaklik dat jy ’n finansiële plan moet hê. Jy moet ’n doelwit hê waarna jy strewe en ’n duidelike plan om daarby uit te kom.

Om jou finansiële portefeulje in stand te hou, word daar aanbeveel dat jy ’n finansiële adviseur raadpleeg.

Wanneer jy met ’n finansiële adviseur oor jou finansiële portefeulje praat, moet jy ’n oorsig gee van jou geldsake, soos die inkomste wat jy verdien en die uitgawes wat jy moet aangaan.

Hoekom is ’n finansiële adviseur belangrik?

Alhoewel geen persoon al die moontlike finansiële kennis het nie, is ‘n finansiële adviseur ‘n aanwins vir enige persoon omdat nie almal weet hoe om finansiële aangeleenthede te behartig nie. Al het jy self goeie kennis en agtergrond van finansies is dit nodig dat jy ’n deskundige op die gebied raadpleeg.

Geldprobleme kan in ’n japtrap opgelos word as die regte advies en riglyne gevolg word.

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170