Bestuur só jou geiser se kragverbruik

Vrydag, Oktober 21st, 2016

Geisers is verantwoordelik vir tussen 30% en 50% van jou elektrisiteitsrekening. Eskom beveel aan dat jy jou geiser tussen 6 vm en 9 vm afskakel om elektrisiteit te bespaar en die las op die nasionale netwerk gedurende hierdie spitstye te verlig.

Die voorgestelde temperatuur vir ’n huishoudelike geiser is 60 ºC. Deur jou geiser se temperatuur te verlaag, kan jy jou huis se elektrisiteitsverbruik verminder en geld spaar! As jy ook jou geiser vir 15 uur per dag afskakel, kan jy ’n 3 kW-geiser van 150 L se kW-verbruik van 360 kWh tot 238 kWh verminder.  Hierdie syfers is net ’n riglyn, want die hoeveelheid elektrisiteit wat jy spaar, sal afhang van die omringende temperatuur, die temperatuur waarop die termostaat gestel is, hoe lank die geiser gedurende die dag aan en af is, en ook jou totale huishoudelike verbruik.

 

Interessante feite

  • Minder energie is nodig om die water weer tot die gestelde temperatuur te verhit as om die water by die gestelde temperatuur te hou.  As jy jou geiser afskakel, daal die temperatuur oor 24 uur gewoonlik met net 10 ºC, en jy behoort dus aan die einde van die dag nog warm water te hê om te stort of te bad.
  • Dit neem ’n 3 kW-geiser van 150 liter ongeveer 2 uur om die water van 20 ºC tot 65 ºC te verhit. Die termostaat of die geiser sal nie beskadig word deur die geiser aan en af te skakel nie. Termostate werk deur aan en af te skakel, en die styging en daling van temperatuur binne die normale perke sal nie die geiser laat bars nie.
  • Isolering van jou geiser en die waterpype na en van die geiser kan die geiser se doeltreffendheid verbeter. Geiserkomberse vertraag die afkoeltempo van ’n geiser met tot 20% wanneer dit afgeskakel is, wat lei tot warmer water in die geiser wanneer dit weer aangeskakel word. Die warmer water in die geiser sal minder elektrisiteit benodig om tot die gestelde temperatuur verhit te word wanneer die geiser weer aangeskakel word. ’n Algemene reël is om 1.5 m van die warmwaterpyp uit die geiser en 1 m van die kouewaterpyp na die geiser ook te isoleer. Toetse toon dat, as die korrekte materiaal gebruik en dit behoorlik geïnstalleer word, daar nie ’n groter risiko van brand of oorverhitting met ’n geiserkombers is nie, net ’n besparing van elektrisiteit en geld!
  • As dit moontlik is, plaas die geiser naby die kombuis en badkamers, waar die warm water nodig is. Hoe korter die afstand tussen die geiser en die krane, hoe minder warmte gaan verlore terwyl die water na die kraan beweeg. Jy spaar ook water omdat die water nie so lank hoef te loop voordat die warm water by die kraan kom nie.

    Wenke om die verbruik van water en elektrisiteit te bestuur
  • Was jou hande met koue water as warm water nie nodig is nie.
  • Neem ’n kort stort eerder as ’n vol bad.
  • Installeer ’n waterdoeltreffende stortkop.
  • Moenie skottelgoed onder lopende water afspoel nie. Hou water in ’n wasbak en spoel dit daarin af.
  • As jou klere nie besonder vuil is nie, slaan jou wasmasjien se voorwassiklus oor.
  • Gebruik altyd ’n volle lading in jou wasmasjien en was items teen 40 ºC – 60 ºC.
  • Gebruik die skottelgoedwasser net as dit vol gelaai is en skakel voor die droogmaaksiklus af. Die skottelgoed kan dan met ’n doek afgedroog word of gelaat word om self droog te word met die masjien oop.

Bron: National Letting  

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170