Beskerm jou identiteit teen gesiglose individue

Vrydag, Oktober 21st, 2016

Al ooit ʼn e-pos van die Verenigde Nasies ontvang wat jou surplusfondse aanbied? Of het J. Edgar Hoover, hoof van die FBI (wat in 1972 oorlede is) jou verwittig dat hy geld opgespoor het wat aan jou behoort? Is jy al ooit ingelig dat jy die Britse lotery gewen het alhoewel jy nooit ʼn kaartjie gekoop het nie? Dit is net ʼn paar voorbeelde van strikroof (“phishing”), en hoe belaglik dit ook mag voorkom, het baie mense al in hierdie strik geval.

Strikrowers is op soek na een ding – jou identiteit en finansiële inligting om jou van jou geld te beroof deur direkte toegang tot jou bankrekening, of erger, deur jou identiteit te steel en jou met ongekende skuld te laat wat nie omgekeer kan word nie.

Dit word beraam dat meer as 100 miljard “spam” e-posse elke dag gestuur word, en meer as die helfte van alle Internet-gebruikers ontvang ten minste een strikroof e-pos per dag. Die beraamde koste van strikroof aan besighede wêreldwyd is ongeveer 98 Amerikaanse dollar per jaar.

Daar is twee tipes strikrowery – spies-strikrowery (“spear-phishing”) en massa-strikrowery (“mass phishing”). Met massa-strikrowery word e-posse aan miljoene ontvangers gestuur. Ongeveer 3% daarvan word oopgemaak. ʼn Slagoffer van massa-strikrowery laat ʼn strikrower gemiddeld R18 000 ontvang. Spies-strikrowery teiken ʼn bate met hoë waarde en sal ʼn strikrower ongeveer R630 000 in die sak bring. Hierdie bedrae kan verskil afhangende van die sofistikasie van die strikroofslenter.

 

Hoe behaal strikroofslenters sukses?

Strikrowers maak gebruik van twee hooftegnieke wat op twee menslike reaksies staat maak: gierigheid en vrees.

As dit te goed klink om waar te wees, dan is dit heel moontlik. Strikrowers sal jou lok met ʼn belofte van geld of ander finansiële gewin. Die strik: voorsien jou persoonlike en bankrekeningbesonderhede en die geld of prys is joune. Hierdie een vang enigiemand wat toelaat dat gierigheid gesonde verstand oorheers.

Die ander strategie wat strikrowers gebruik, is vrees. Al ooit ʼn e-pos van ʼn bank of handelaar ontvang wat jou inlig dat as jy nie onmiddellik reageer nie, jou rekening opgeskort sal word tensy jy jou persoonlike en finansiële inligting summier verskaf, hetsy binne die e-pos of deur op ʼn skakel te klik wat jou na ʼn ander webwerf neem? Die pos mag eg lyk, maar geen bank of finansiële diensverskaffer kan hierdie inligting via e-pos aanvra nie, veral wagwoorde of pin-nommers.

As daar ʼn probleem met jou rekening is, sal ʼn bank jou persoonlik kontak en jou sekerheidsvrae vra. Dring altyd aan op die naam van die diensagent, hulle lynbestuurder en ʼn verwysingsnommer. Vra ook vir ʼn kontaknommer – ʼn direkte nommer sowel as vir die relevante departement. As jy ongemaklik voel oor die oproep, sê eerder jy sal hulle terugskakel om te verifieer dat dit eg is.

Sedert die Wet op die Finansiële Intelligensiesentrum (FICA) in werking getree het, mag geen veranderings op finansiële rekenings aangebring word sonder dat korrekte prosedures gevolg is nie. As dit lyk of dit gepypkan word, wees agterdogtig. Onthou, geen werknemer van enige bank mag wagwoorde van jou aanlyn-profiele of jou pin-nommer vra nie – as iemand voorgee dat hulle vir ʼn bank werk en enige van die twee vra, lui af!

Moenie eers e-posse oopmaak van mense of adresse wat jy nie herken nie. Om “spam”-pos oop te maak, mag wanware (“malware”) op jou rekenaar laai, wat persoonlike inligting en wagwoorde kan opspoor. Vee eerder verdagte e-posse dadelik uit. Maak gebruik van anti-virussagteware wat jou bank aanbied om jou stelsel so bes moontlik te beskerm.

Net soos jy nooit jou ID-dokument, bestuurderslisensie, kredietkaarte of bankkaarte (met PIN-nommers) vir ʼn vreemdeling sal gee en hulle toelaat om daarmee weg te loop nie, waarom sou jy hierdie items per e-pos aan ʼn gesiglose individu verskaf?

 

Bron: FNB

 

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161