Belastingafslag vir huiseienaars

Woensdag, Oktober 21st, 2015

As dit kom by belastingaftrekkings wat ’n belastingbetaler van die Ontvanger van Inkomste mag eis, rus die onus op die belastingbetaler om te bewys dat ’n bepaalde bedrag aftrekbaar is. Nie net moet die belastingbetaler bewys dat die bedrag aftrekbaar is nie, maar moet ook die eis regverdig deur aan te toon hoe die bedrag bereken is.

Adrian Goslett, streekbestuurder en HUB van RE/MAX Suider-Afrika, sê hoewel baie huiseienaars vir belastingafslag in aanmerking kom, dit nie altyd vir hulle maklik is om te bepaal watter bedrag van die rente op hul verband belastingaftrekbaar is nie. “Selfs al lyk die situasie betreklik eenvoudig, duik daar dikwels komplikasies en vrae op en ’n huiseienaar moet seker wees van wat gedoen moet word of, as daar twyfel is, ’n professionele persoon raadpleeg,” sê Goslett.

Hy gee ’n voorbeeld van ’n huiseienaar wat ’n huis vir R1 miljoen gekoop het en 20% van die huis as ’n tuiskantoor gebruik omdat die eienaar vir belastingafslag in aanmerking sal kom. “As die huidige bedrag wat op die verband verskuldig is R800 000 is en die rentekoers op die verband is 14%, is die jaarlikse rente op die verband R112 000. Omdat 20% van die huis as ’n tuiskantoor gebruik word, is die huiseienaar daarop geregtig om 20% van die R112 000 as belastingafslag in die produksie van sy of haar huurinkomste te eis,” verduidelik Goslett.

“As die huiseienaar in hierdie geval besluit om nog R100 000 teen die verband te trek om persoonlike uitgawes te finansier, wat die saldo van die verband op R900 000 te staan bring, sal die bedrag aan belasting op die bykomende R100 000 nie in berekening gebring kan word nie omdat dit nie vir die produksie van inkomste gebruik is nie,” verduidelik Goslett verder.

“Die belasting op die bykomende R100 000 word uitgesluit van die berekening van aftrekbare inkomste vanaf die tyd dat dit geneem word vir al die komende jare waartydens die huiseienaar die verband dra. Dit beteken in wese dat ’n kleiner persentasie van die oorspronklike 20% wat op die verbandstaat aangetoon word van dan af vorentoe belastingaftrekbaar sal wees.”

Goslett voeg by dat die persentasie aftrekbare rente sal aanhou verander as die huiseienaar verdere onttrekkings uit die verbandrekening maak vir ander nie-inkomstegewende doeleindes.

Volgens Goslett wil baie huiseienaars weet of hulle kan kies hoe hulle ’n onverwagte geldmeevaller aan hul verbandrekening kan toewys. “As die huiseienaar in bogenoemde geval ’n erflating van R200 000 ontvang het, het die eienaar dan die opsie om die geld slegs aan die 80% privaat gedeelte van die verband toe te wys en nie aan die 20% wat as kantoorruimte beskou word nie ten einde ’n groter belastingaftrekking te los?” vra Goslett. “Die kort antwoord op daardie vraag is nee, omdat die verband beskou word as een rekening wat nie in verskillende segmente verdeel of geproporsioneer kan word nie. Ongeag hoe die huis verdeel is en watter persentasie vir persoonlike doeleindes en watter vir besigheid gebruik word, die verband dek die hele eiendom. Dit beteken dat enige geld wat aan die verbandrekening toegewys word, die verbandsaldo in sy geheel sal kleiner maak.”

Goslett merk op dat, indien die huiseienaar ander lenings het wat nie belastingaftrekbaar is nie, dit vanuit ’n belastingbeplanninsperspektief ’n potensieel beter opsie kan wees om die erflating te gebruik om eerder daardie lenings af te betaal.

“Om met belasting te werk en te weet wat afgetrek of nie afgetrek kan word nie, kan nogal soms oorweldigend wees. As mens ooit twyfel, is dit die beste om ’n professionele finansiële adviseur of belastingkonsultant te raadpleeg wat hulp en leiding deur die proses kan gee,” merk Goslett ten slotte op.

  • ThysB

    Wat ook in ag geneem moet word is die implikasie op die kapitaalwins belasting vrystelling Wat op privaat wonings geld. Die 20% Wat vir besigheid gebruik word sal nie as deel van die vrystelling gesien word nie.

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161