Altyd platsak voor betaaldag? Hier’s advies

Dinsdag, Oktober 4th, 2016

Karen van der Berg

 

Daar is nog so baie maand oor aan die einde van my geld. As jy gereeld so voel en teen betaaldag nie meer ’n sent oor het nie, is dit tyd om dinge anders te begin doen.

Met die nodige beplanning is dit moontlik om aan die einde van die maand steeds van jou salaris oor te hê en daar is geen rede om elke maand platsak te wees nie.

So sê Cobus Venter, ’n finansiële beplanner van Johannesburg.

Hy sê indien jy elke maand in dieselfde benarde geldelike bootjie is, is die rede dalk omdat jy geen finansiële plan of begroting het nie.

“As jy sonder duidelike uiteengesette kort-, medium- en langtermyndoelwitte is, sal finansiële vryheid soos ’n onbereikbare fantasie lyk – en so ook om jou salaris tot die volgende betaaldag te laat hou. Dit hoef nie oorweldigend of intimiderend te wees om ’n finansiële plan in werking te stel nie. Of jy nou besluit om dit self te doen of met die hulp van ’n kenner, begin eenvoudig deur jou doelwitte te prioritiseer en sit die lys waar jy dit gereeld kan sien. Dit kan jou lewe verander.”

Hy sê mense maak ook graag die fout om duur goedere te koop in ’n poging om beter oor hulleself te voel.

“Die lekkerkry-gevoel is ongelukkig net van korte duur. Sodra die rekeninge en kredietkaartstate inrol, rol die lekkerte uit.” Hy sê mense moet ook in die gewoonte kom om nie onnodige dinge te koop nie. “Die meeste van ons leef op ’n hoër peil as wat ons kan bekostig en gebruik ons kaarte meer as wat ons behoort te doen. Chroniese oorbesteding en hoë-rente-kredietkaartskuld is die grootste vyand van jou begroting. Gee geld uit asof jy arm is en jy sal veel eerder ryk word – of dit tot die volgende betaaldag maak.”

Nog ’n groot fout wat mense maak, is om eers te bestee en later te spaar.

“Die mees doeltreffende manier om te spaar is om dit outomaties deel van jou aftrekkings te maak. Dit moet iets wees wat nie onderhandelbaar is nie. As ons nie spaar nie, gaan ons in elk geval daardie geld uitgee op iets wat ons nie noodwendig nodig het nie.”

Volgens Cobus maak mense ook ’n groot fout omdat hulle nooit spaar vir noodgevalle nie.

“Die goue reël is om inderwaarheid ses maande se salaris in ’n noodfonds te hê. Dit is baie moeilik, maar dit kan ’n skielike drastiese uitgawe help makliker maak.”

Die laaste waarskuwing wat Cobus het oor waarom jy moontlik nie geld aan die einde van die maand het nie, is omdat jy ’n mens is wat maklik beïnvloed word.

“Almal van ons het negatiewe invloede in ons lewe wat maak dat ons onnodig geld uitgee en die materialistiese kultuur waarin ons leef, moet waarskynlik die meeste van die skuld daarvoor kry. Die kuns is om nie voor die versoeking te swig nie. Jy moet ’n bewustelike besluit neem om te vermy dat jy in ’n kwesbare posisie beland.”

Hy sê ’n paar kopskuiwe en die nodige beplanning kan maak dat jy elke maand teen betaaldag inderwaarheid nog ’n ietsie oor het.

“Beplan op die regte manier en oorleef met jou salaris.”

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161