8 goeie geldgewoontes wat jy vandag kan leer

Vrydag, Februarie 5th, 2016

Wenk 1: Lees oor finansies

Bestee 30 minute een keer per week om oor persoonlike finansies te lees. Lees ʼn boek of aktuele artikel. Deur jouself voortdurend op te voed oor geldsake, sal jy meer kundig wees wanneer jy dit wil bestee.

 

Wenk 2: Skeduleer ʼn weeklikse begrotingsvergadering

Die enigste manier om by ʼn maandelikse begroting te hou is om jou vordering gereeld aan te teken en te volg. Bestee een keer per week 15 minute (miskien ʼn Sondagaand of Maandagoggend) en kontroleer of jou bankbalans ooreenstem met wat dit behoort te wees. Indien nie, kyk waar jy in die komende week kan besnoei.

 

Wenk 3: Identifiseer slegte geldgewoontes

Jy ken jouself. Jy weet waar jou bestedingswakhede lê. ‘n Vinnige verwysing na jou maandelikse bankstaat sal dit ook bevestig. Wees eerlik en maak ʼn lys van jou slegte finansiële gewoontes. Noudat jy weet wat dit is wat jou van finansiële sukses weerhou, kan jy begin om hulle uit te skakel.

 

Wenk 4: Kweek goeie geldgewoontes een op ʼn slag

Daar is baie gawe geldgewoontes wat jou met verloop van tyd finansieel verantwoordelik en stabiel sal maak. Kweek hulle een op ʼn slag. Wag totdat ʼn spesifieke gewoonte tweede natuur is voordat jy die volgende een byvoeg.

 

Wenk 5: Pak ʼn kosblik en kook slim

Om ʼn kosblik vir die werk te pak en slim te kook is nie net gesonder nie maar ook kostedoeltreffend. Dit mag byvoorbeeld dalk nie duur lyk om elke dag ʼn R30-R50 middagete by die kantien of die wegneemete-plek om die hoek te koop nie … maar oor 20 werksdae kan die bedrag R600-R1000 beloop. Deur jou eie middagete tuis voor te berei en maaltye doeltreffend te beplan, kan jy baie geld spaar.

 

Wenk 6: Moenie jou bonus/belastingterugbetaling uitgee nie

Om jou bonus of belastingterugbetaling nolens volens te spandeer is baie aanloklik. Die oordoen van jou slaapkamer … ʼn klomp nuwe uitrustings … ‘n gesinsvakansie … ens. Dis normaal om jouself te wil bederf. ʼn Goeie gewoonte om egter aan te leer is om dit in ʼn spaarrekening te plaas sodra jy dit ontvang en dit later (saam met ander spaargeld) te gebruik vir iets waardevoller, soos jou kinders se opvoeding, aftrede, ens. Alternatiewelik kan jy dit gebruik om skuld af te betaal sodat jy die maandelikse paaiemente wat jy moet betaal, kan verminder. Om nie daardie ekstra fondse onmiddellik te spandeer nie sal ʼn meer geldbewuste gewoonte kweek.

 

Wenk 7: Outomatiseer jou spaargeld

Deur jou spaargeld outomaties oor te plaas in rekenings waartoe jy geen toegang het nie, sal jy daarvan begin vergeet. Dit is maklik om te spaar as jy dit as ʼn “moet spaar” uitgawe sien wat aan die begin van elke maand afgetrek word.

 

Wenk 8: Skaf ʼn kleingeldbottel aan

Plaas jy waarde op geld? Wat van die kleingeld onder in jou handsak, of die muntstukke in jou laai by die werk? Leer om geld te respekteer, selfs in sy eenvoudigste vorm. Maak ʼn kleingeldbottel en gooi al jou los kleingeld daarin. Wanneer dit vol is, neem dit bank toe en plaas die geld in jou spaarrekening. Jy sal verbaas wees om te sien hoeveel dit kan wees.

 

Bron: DebtRescue

Ander Artikels

Art. 11(a) van die Wet op Inkomstebelasting en die aftrekbaarheid van renteonkoste op huislenings
Louis Botha     Op 13 Desember 2016 het die belastinghof in Kaapstad uitspraak gelewer in X v The Commissioner for the South African Revenue Service (saak no. 13791 & 13792, nog nie gerapporteer nie). Die saak het gehandel oor ʼn interessante vraagstuk, naamlik of uitgawes wat aan ʼn huislening aangegaan word om ʼn rente-inkomste […]
Huurverbeteringe: Mag ek vat of moet ek los?
Vraag: “Ons huur nou al vir ʼn paar jaar ʼn huis. Ek en my vrou het heelwat verbeterings aan die huis en tuin aangebring. Ek word nou verplaas en moet verhuis, maar wonder nou wat word van al die verbeterings aan die huurperseel. Mag ons dit saamneem of moet die verhuurder ons vergoed daarvoor?”   […]
Die beste wenke om jou huurdeposito terug te kry
Huurders in Suid-Afrika betaal tans enigiets tussen een en drie maande se huur as skadedeposito ─ maar is dikwels onseker van wat om te doen as hul huurkontrak verval. “Hoewel deposito’s dikwels gebruik word om huurwanbetaling of onbetaalde utiliteitsrekenings te dek, is hul hoofdoel om verhuurders teen skade aan die eiendom te dek,” sê Andrew […]
1 2 3 170