Kan ek my huurder se slotte verander?

Dinsdag, Maart 29th, 2016

Vraag: “Ek verhuur ’n klein meenthuis aan ’n jong huurder. Ongelukkig is die huurder onbetroubaar met die betaling van sy huur en is daar altyd een of ander verskoning. Ek is nou keelvol vir die situasie en wil hom net uit my meenthuis hê. Kan ek die slotte verander terwyl hy by die werk is?”

 

Antwoord: Die verhuring van eiendom kan beslis finansieel voordelig wees. Daar is egter altyd die moontlikheid van ’n slegte huurder wat die appelkar kan omgooi.

Nes ’n verhuurder sekere verpligtinge het teenoor ’n huurder, so is dit ’n huurder se plig om sy huur betyds te betaal. Dit word bepaal deur die terme en voorwaardes van die huurooreenkoms.

So aanloklik soos dit egter mag klink om self in te gryp, is die antwoord nie om die reg in eie hande te neem nie – dit sal net die situasie vererger. Om eie reg te neem, ongeag of die huurder se huur agterstallig is, is onwettig.

As jy die slotte sonder die huurder se toestemming verander, sal dit neerkom op die onwettige ontneming van die huurder se gebruik en genot van die huureiendom wat verhoed word in terme van die Wet op die Voorkoming van Onwettige Uitsetting en Onregmatige Besetting van Grond (“VOU Wet”). Dan kan jou huurder ’n dringende hofbevel teen jou kry mét kostes, selfs al is die huurder se maandelikse huur agterstallig, wat jou dan sal dwing om die huurder se gebruik en genot van die huureiendom te herstel. Jou huurder kan moontlik ook ’n klag indien by die Huurbehuisingstribunaal.

Maar wat staan ’n verhuurder dan te doen? Wanneer ’n huurder nie sy huurder betaal nie, oortree hy/sy die huurooreenkoms. Die verhuurder moet die huurder van die oortreding in kennis stel en die huurder vra om die oortreding reg te stel. As die huurder ten spyte van die verhuurder se aanmaning steeds nie die oortreding regstel nie, kan die verhuurder die huurooreenkoms kanselleer en, indien die huurder weier om die eiendom te verlaat, ’n uitsettingsproses begin in terme van die VOU Wet.

Wat bogenoemde wys is dat daar wel regstappe beskikbaar is wat jy kan neem in geval van ’n slegte huurder. Wat jy nié moet doen nie, is om die reg in eie hande te neem. Kontak ’n litigasie-spesialis om jou te help met jou slegte huurder, aangesien die VOU Wet sekere voorskriftelike bepalings het wat streng gevolg moet word.

 

Bron: BDP Prokureurs

Ander Artikels

Afdwing van verbruikersregte deur die howe: Gebruik eers ander remedies
Justine Krige   Artikel 69 van die Wet op Verbruikersbeskerming (Wet 68 van 2008 [CPA]) sit ʼn verskeidenheid statutêre remedies uiteen vir die afdwing van verbruikersregte ingevolge die CPA. Dit sluit in die indien van ʼn klagte by die Nasionale Verbruikerskommissie (Kommissie), die verwysing van ʼn dispuut na die Verbruikerstribunaal (Tribunaal), of om ʼn bedryfsombudsman […]
Wie mag waar parkeer in ʼn meenthuiskompleks?
Vraag: “In die deeltitelskema waar ek woon is daar ʼn konstante gebaklei en gestry oor wie waar mag parkeer en wie verantwoordelik is vir die instandhouding van parkeerplekke. My vraag is: wie besluit watter dele van die skema vir parkeerplekke toegeken word, wie dit mag gebruik en wie dit moet in stand hou?” Antwoord: Wat […]
Moenie vanjaar val vir hierdie belastingslenters nie
Lede van die publiek ontvang dikwels ewekansig vals e-posse wat nagemaak is om te lyk asof hulle deur die SAID gestuur is, maar wat in der waarheid vals e-posse is wat daarop gemik is om niksvermoedende belastingbetalers uit te lok om persoonlike inligting, soos bankrekeningbesonderhede, te onthul. Voorbeelde sluit in e-posse wat skyn afkomstig te […]
1 2 3 150