4 slegte geldgewoontes en hoe om hulle te fnuik

Vrydag, Februarie 26th, 2016

Gewoontes word neurologies in ons brein gevorm na die voordurende herhaling van dieselfde gedrag. Gewoontes word moeilik gekweek en is net so moeilik om te staak. Wanneer dit by geldgewoontes kom, is ons egter geneig om makliker riskante patrone te vorm, want, laat ons maar eerlik wees, dis lekker om onsself te bederf.

Slegte geldgewoontes, soos die vier algemeenste wat hieronder bespreek word, kan te bowe gekom word. Doen dit so:

 

Slegte gewoonte #1: Geen begroting

Leef jy van een salaristjek na die volgende sonder om werklik te weet wat kom in en wat gaan uit? As jy nie weet wat die waarheid is omtrent jou maandelikse finansies nie, sal jy nie in staat wees om ingeligte besluite oor onkostes te neem nie, en kan jouself vinnig in skuld dompel.

Oplossing: Stel ʼn maandelikse begroting op en leef elke dag daarvolgens. Voordat jy ʼn transaksie beklink, verwys na jou begroting en vra jouself of jy dit kan bekostig al dan nie. Om te begroot is die eerste stap om werklik jou finansiële welstand te begryp.

 

Slegte gewoonte #2: Spaar glad nie

As jy nie spaar nie, het jy geen kussing vir enige onvoorsiene uitgawes nie. Om jou kredietkaart of oortrokke rekening te gebruik is jou enigste redding wanneer ʼn onverwagte betaling opduik. Hierdie gewoonte sal jou vinnig in die moeilikheid laat beland wanneer rente en ander ekstra onkostes begin ophoop.

Oplossing: Om te spaar behoort deel van jou begroting uit te maak. Begin klein en groei jou spaargeld maand-na-maand deur op nie-noodsaaklike uitgawes te besnoei.

 

Slegte gewoonte #3: Bestee meer as wat jy verdien

As jou uitgawes meer is as jou inkomste, gaan jy skuld aan om daardie ekstras te befonds, reg? Hierdie gewoonte sal in ʼn kort tyd buite beheer raak. Hoe meer skuld jy het, hoe meer rente sal jy moet betaal. Elke maand sal jy meer skuld moet aangaan om jou normale lewenstandaard te handhaaf.

Oplossing: Besnoei op jou uitgawes. Begin met luukse artikels soos haarbehandelings, satelliet-TV, klere-inkopies, wegneemetes, uiteet ens. ʼn Begroting sal jou hiermee help.

 

Slegte gewoonte #4: ʼn “Olke Bolke”-skuldbetalingstrategie

Om skuldpaaiemente een maand te betaal en dit die volgende maand te ignoreer is die maklike manier om ʼn swak kredietrekord op die hals te haal. Jy moet elke maand al jou skuldpaaiemente betaal.

Oplossing: Stel ʼn begroting op en probeer onkostes sny waar jy kan. As jy steeds nie die pyp kan rook nie, is jy te diep in die skuld en moet jy professionele hulp kry.

 

Bron: Debt Rescue

Ander Artikels

Wie betaal vir die vervanging van ʼn meenthuis-uitlaatpyp?
Vraag: Gee asseblief raad oor wie verantwoordelik sou wees vir die vervanging van ʼn uitlaatpyp in die kombuis van ʼn eenheid as dit deurgeroes het en aan die buitekant van die eenheid afgebreek het.   Antwoord: Eienaars is verantwoordelik vir die herstel en onderhoud van hulle eenhede en die beheerliggaam het dieselfde verantwoordelikheid met betrekking […]
Tipes kontantbeleggings
VASTE DEPOSITOREKENING ʼn Vaste depositorekening is ʼn tipe spaarrekening waar jy jou kontant vir ʼn spesifieke tydperk deponeer in ruil vir ʼn vaste rentekoers, wat gewoonlik hoër is as een wat jy uit ʼn gewone bankrekening sou ontvang. Tipies vereis vaste depositorekenings dat fondse in die rekening gelaat word tot die vervaldatum, met moontlike boetes […]
Voertuigfinansiering verduidelik
Tensy jy ʼn rekenmeester is, is voertuigfinansiering gekompliseerd. Weet jy hoe finansieringsbepalings werk? Is dit ʼn goeie idee om ʼn residu te neem?  Wat van die rentekoers – moet jy dit vas of gekoppel neem? Ons het met WesBank gesels vir hierdie beginnersgids oor die finansiering van die motorvoertuig van jou drome! Bereken hoeveel jy […]
1 2 3 161